NIAS, MYC & MBOCWWB MoU Titawp turin 2015-ah hmalak a ni

Nalanda Institute of Advance Studies (NIAS), Kolkata-a Mizo zirlaite thawn thlak an nih chung­changah Mizoram Building and Other Construction Workers Welfare Board (MBOCWWB) chuan an thawhhona tihtawp a nih theih nan kum 2015 khan Mizoram Youth Commission (MYC)-ah rawtna an lo thlen tawh. MYC pawhin NIAS, Kolkata-in Mizo zirlai an dil belhna chu an pek theih tawh loh thuin NIAS Chairman an lo hrilh tawh bawk.

MBOCWWB secretary Lalhma­chhuana chuan MYC Secretary hnenah lehkha thawnin, August 4, 2015-a an meeting thuchhuak angin, (Letter No C.33033/11/2014-WB (LE&IT) 128-136) MYC chu NIAS, Kolkata leh MBOCWWB-in inremna thuthlung (MoU) an ziah titawp turin a ngen a ni.

MoU-a inziaka ṭan chhanah chuan, MoU-a Miscellaneous chhunga point no. 5.4-in a tarlan angin, 'MoU titawp tur hian MYC/MBOCWWB-in NIAS hnenah thla khat advance-in notice a pe ang a, tichuan MoU hi tihtawp (terminate) theih a ni ang,' tih a ni. (The MYC/MBOCWWB shall have prerogative to terminate this Memorundum of Understanding after giving notice of one month in advance of the date of termination).

Lehkha hi MBOCWWB chuan September 15, 2015-a pek chhuah turin an peih a, MYC Secretary chuan September 18, 2015-ah a dawng. Amaherawhchu, hemi chungchangah hian MYC chuan hma a lo la tawh a, August 14, 2015-ah NIAS Chairman hnenah MoU tihtawp chungchang hi ziakin a lo thlen tawh a ni. ( Letter No A 33023/11/2011-MYC)

MYC Secretary-in NIAS chair­man, Mainak Saha hnena lehkha an thawnah hian, NIAS Chairman-in LEIT minister Lalrinmawia Ralte hnena agreement anga NIAS-a zirlai naupang 18 zir leh tur an dil belhna chu an ngaihtuah thu te, sum harsatna vanga zirlai an thawn theih loh thu ziakin a hriattir a ni.

MYC Secretary lehkhaah hian NIAS, MBOCWWB leh MYC ten tri-partitite MoU ziak anga lang pawh an pawm loh thu leh a chhan pawh MYC chu signatory a ni lo a, hriatpuitu (witness) chauh a nih avangin MoU chu MYC chuan a pawm loh thu leh awmze nei lo (null and void)-a ngaih tur a nih thu tarlan a ni bawk.

NIAS, Kolkata-a zir tur thawn tur hian a tira inremnaah chuan mi 50 thawn tur a ni a, a vawi khatnaah zirlai 32 thawn a ni. A hnuah NIAS Chairman-in mi 18 thawn leh turin LEIT Minister hnenah a ngen. Meeting chuan, sum harsatna vanga an thawn theih tawh loh thu ziakin a hriattir a; an thawn theih loh chhan dang erawh chu document-ah ziah lan a ni lo.