Manipur-ah tuialhthei phur lut zel

Churachandpur Autonomous District Council (CADC) hotute leh Manipur Group YMA hruai­tute ngen vangin, Central YMA hriatpuinain Mizoram aṭangin Churachandpur, Manipur-ah tuialhthei phur luh zel a la ni a, CYMA hriatpuina loa phurhte chu man ṭhin a ni.

Central YMA Kumpuan Committee chuan December 2016 tawp lam khan petrol pump ṭhenkhatin Manipur-a zawrh tur petrol leh diesel an hralh nasa niin an hria a, pump neitute chu state dang tana hralh chhuak tawh lo turin an ngen. Kumpuan Committee hian an chhui chian hnuah tuialhtheite hi Manipur-ah phurh rûk ṭhin a ni tih an finfiah.

Dan loa tuialhthei Manipur-a phurh luh tumte chu CYMA hma­laknaa dan ṭhin a nih hnuah, January 4, 2017 khan CADC hotu­te leh Manipur Group YMA hruaitute'n CYMA hruaitute an kâwm a; tuialhtheia harsatna an neih sutkian a nih theihna atan pui turin an ngen. Meeting-ah hian CYMA remtih­puinain Mizoram aṭangin Manipur-ah tuialhthei thawn tura tih a ni.

Vanglaini palai zawhna chhangin CYMA Kumpuan Committee chairman Vanlalruata chuan, tuialhtheite hi CYMA hriatpuinain Manipur-ah phurh luh zel a la ni tih sawiin, "Tuialhthei an mamawh dan Manipur lam nen inbiak tawn reng a ni a, chumi mil chuan tuialthei hi Manipur-ah phurhtir ṭhin a ni," a ti.

Vanlalruata chuan, CYMA hriatpuina loa tuialhthei phurh tum man tur an la awm zel thu sawiin, "Hmun hrang hrangah YMA member-te an duty a, phalna nei lote chu an lo dang ṭhin," a ti a; CYMA hriatpuina loa phurh tuialhtheite chu Mizoram chhunga vek hralh leh ṭhin a nih thu a sawi.

Hetih lai hian, YMA sub-headquarters, Champhai hmalakna kal zelah tun hnai khan CYMA hriatpuina loa tuialhthei phurh lo dang turin Champhai Zote-ah duty point siam belh leh a ni a, branch hrang hrangte an in duty chhawk ṭhin. A hmain Ngur leh Ngur Vengsang branch YMA-te chu dan loa tuialthei Manipur-a phurh tur vengte chu an lo duty tawh a, tuialthei phur eng emaw zat an dang tawh a ni.