MNF-in MBOCWWB chhui chian an phût

MNF ṭhalaite chuan nimin khan Aizawl Press Club-ah thuthar thehdarhtute an kâwm a; Mizoram Building and Other Construction Workers Welfare Board (MBOCWWB) chhui chiang turin Mizoram sor­kar an phût.

MNYF president K Vanlalvena chuan, MB­OCWWB chu mipui hmaa an inpho chhuah danah chuan chhenfâkawm tak nia a lan laiin, tuna an kalphung enin thil fel lo a tam hle tih a lan thu a sawi a, "Thawktu 35 lek nei chung si leh officer pathum lek nei chung sia driver pakua lai an nei lawi site hi thil dik niin a lang lo," a ti.

MBOCWWB mem­ber-te leh an fate ṭanpuina atana sum tlingkhawm ni si, mi lian leh Board hotute'n loan hming vuahin sum tam tham tak an ṭhâm mai mai nia sawiin K Vanlalvena chuan, "Hengte hi a bawlh­­­hlawh hle," a ti a; MBOCWWB chu chhui chiang ngei tura sorkar an phût thu a sawi.

K Vanlalvena chuan, NIAS, Kolkata-a zir­lai­te'n harsatna an tawh chungchangah a mawh­phurtute chu chhui chhuah hranpa pawh ngai hauh loin, mitdel biru ang maia lang chiang sa a ni tih sawiin, "LEIT department, MBOCWWB, Mizoram Youth Commission-te an ni mai. Heng department leh agency-te enkawltu ber minister Lalrinmawia Ralte leh MYC chairman T Sangkunga hian an mawhphurhna an hlen zo lo tih hi pawmin, thupha chawi hi an tihmâkmawh a ni," a ti.

Eng department-ah pawh official-te zingah mi dik lo an lo awm a nih pawhin, chu'ng hote thunun tur chuan mipuite'n aiawh an thlang tih sawiin MNYF President chuan, "Chuti chunga official-te dik lohna vanga tuar an lo awm a nih chuan a mawhphurtu ber chu Minsiter leh MLA tho an ni," a ti a; NIAS Kolkata-a zirlaite harsatna tawhah a kaikuang dik tak chu a changtu Minister leh MYC Chairman an nih thu a sawi bawk.