KHAWTHLIR
Scholarship sem
Siaha district chhunga Beti Bachao Beti Padhao (BBBP) hnuaia hmeichhe naupang zirlai thlan bikte hnenah, Nilaini khan Siaha DC conference hall-ah scholarship hlan an ni. Scholarship hi primary school zirlai mi 15 hnenah thla tin Rs. 800 ṭheuh, middle school zirlai 10 tan Rs. 1000 ṭheuh, high school zirlai pathum tan Rs. 1,200 ṭheuh leh higher secondary zirlai pahnih tan Rs. 2,000 ve ve tur a ni a, kum khat atan a ni.
Gas hralh rûk tur man
YMA sub-headquarters, Lunglei hruaitute chuan January 25, 2017 zan khan Hminlokàwna gas phur truck, MZ-07 1101 leh 407 truck MZ-02 7828-a gas hralh rûk an tum lai an man a, gas bûr ruak 30 an man tel. Gas bûr ruakte chu Hrang-chalkawn police-te kutah an hlân. Gas hi Khuma Gas Agency, Lawngtlai ta tur niin an sawi.
Thisen pe
Aizawl Theological College (ATC) zirlaite chuan nimin khan Republic Day lawm nan blood donation camp an huaihawt a, mipa 28 leh hmeichhia pahnihte'n Synod Hospital tan thisen unit 30 an pe. Synod Hospital-a thawktute chuan ATC zirlaite hi an hmunah an kal chilh a ni.
Laboratory hawng
Chawngte khuaa Udoygiri Higher Secondary School-a science laboratory thar chu January 25, 2017 khan minister of state Dr Buddha Dhan Chakma-a'n a hawng. Udoygiri HSS hi Lawng-tlai district-a pawl 12-a science zir theihna hmasa ber a ni a; science laboratory hi Dr BD Chakma MLA fund Rs. 2,80,000 leh MP fund Rs. 2,50,000 hmanga din a ni.
Minister-in lawmpui
ICT minister Lal Thanzara chuan, Nilaini khan a pisaah Digital India Champion Award 2016 dawngtu ICT-a chief informatics officer Lalthlamuana Khawlhring leh National Recognized Trainer-in e-Governance nihna pek thar, Mizoram State e-Governance Society project manager Issac Zothanpuia te lawmpuina hun a buatsaih.