Hmun hrang hrangah Republic Day lawm a ni

Nimin khan Mizoram district khawpui tin leh hmun dang ṭhenkhatah Republic Day vawi 68-na lawm a ni. District headquarters-ah chuan bawrhsapte'n an hmanpui a, sub-division-ah SDO-te'n an hmanpui.

LUNGLEI:

Republic Day hi Lungleiah chuan Ṭhuam­luaia Mualah lawm a ni a, district bawrhsap K Lalrohlua'n hnam puanzar a pawt pharh. K Lalrohlua chuan, India ram danpui ropuina leh hlutna hre thar leh turin mipui a chah a; ṭhangtharte hnutchhiah tlak hmasawnna tluan­tling a awm theih nan sorkar hnathawkte an hna ṭheuha inpe thar tura a ngen bakah, sorkar hmalaknate tihlawhtling tura sorkar ṭawiawm ṭha turin mipui a sáwm.

Lunglei DC chuan, kum kal mekah sorkar­ah Lungleia Taxation department-in Rs. 9,30,60,000, Excise & Narcotics department-in Rs. 6,78,20,766, Printing & Stationery-in Rs. 9,68,365 leh Commerce & Industries-in Rs. 20,00,000 an chhûn luh tawh thu a sawi bawk.

Lungleia R-Day lawmnaah hian parade contingent 20 an awm a; armed contingent pahnih, unarmed contingent pali, school contingent 12 leh pipe band pahnih an ni. 1st Assam Rifles-te'n Dog Show an nei bawk.

SIAHA

Siaha-ah chuan District Playground-ah lawm niin, DC Harleen Kaur khuallian a ni a, parade contingent 16-te'n hnam puanzar chibai an bûk a chháng let.

Harleen Kaur chuan, India ram danpui hnuaiah ramin chak taka hma a sawn mek laiin, Siaha district pawhin hma a sawn ve zel tih a sawi a; hmasawnna atana theihtawp chhuah ṭheuh turin Siaha district mipui a chah.

Siaha-a R-Day lawmna parade-ah hian uniform contingent-ah Mizoram Home Guard pakhatna an ni a, 2nd Bn. MAP leh Don Bosco School NCC ten an dawt. School contingent-ah Adventist English Academy pakhatna an ni a; Siaha High School leh Christian Higher Secondary School ten an dawt. Sorkar department hrang hrangte'n tableu show an nei a, a tih ṭha zual pathum hnenah lawmman hlan a ni bawk.

CHAMPHAI

Champhaiah chuan Chhangphut Field-ah lawm niin, DC Vanlalngaihsaka khuallian a ni a, parade contingent 24 awmin, unarmed contingent pali leh school contingent 20 an ni.

Vanlalngaihsaka chuan, Champhai district-ah NLUP thawh thumna leh thawh lina kalpui mekah mi 1,706 an awm thu a sawi a; an district-a khaw 108-a chhungkaw 29,403 zinga chhungkaw 2,705 (9.20%) chu BPL chhungkua an nih thu a sawi rualin, an district khaw panga - Chawngtlai, Pàmchung, Rabung, Riangtlei leh Tlangmawi khuaahte BPL chhungkua an awm loh thu a sawi bawk.

Champhai DC hian parade contingent zinga tiṭhate hnenah lawmman a hlan a; school contingent-ah BC English Academy Girls pakhatna niin, GM Higher Secondary School boys leh Holy Cross H/S boys-te'n an dawt. Unarmed contingent-ah Champhai College NCC pakhatna an ni.

KOLASIB

Kolasib-ah chuan Ṭumpui Field-ah hman niin, bawrhsap H Lalengmawia'n hnam puanzar a pawt pharh. H Lalengmawia chuan, Kolasib district-a sorkar hmalakna hrang hrang sawiin, "Bairabi - Sairang rêl kawng siam mek chu zawh hun tur ruahman chhunga zawh a nih ngei theih nan chak taka hmalak mek zel a ni," a ti a; Tuirial Hydel Project chu kumin kum laihâwlah hawn tum a ni a, tuikhuahah tui metre 52-a sang tlin tawh thu a sawi.

Kolasib-ah hian parade-ah contingent 19 an tel a; armed contingent pakhat, uniformed contingent paruk, school contingent 11 leh pipe band pakhat an ni. Uniformed contingent-ah St.John’s HSS Scouts & Guides pakhatna an ni a, St.John’s HSS NCC Girls pahnihna niin, Excise & Narcotics department pathumna an ni. School contingent-ah JNV, Thingdawl pakhatna an ni a, Kolasib DIET leh Rengtekawn H/S ten an dawt.

SERCHHIP

Serchhipah chuan Khawtetlang khelmualah lawm a ni a, khuallian Serchhip bawrhsap Dr Lalrozama'n hnam puanzar a pawt phrah. Dr Lalrozama chuan, NLUP hnuaiah Serchhip district-ah ṭanpuina chhungkaw 9,524 pek an nih thu a sawi a; Serchhip district-a sorkar hmalakna hrang hrangte a sawi.

Serchhipah hian parade contingent 12 an awm a, armed contingent pakhat, unarmed contingent pakhat leh school contingent 10 an ni. Parade-ah hian school contingent zingah Little Flower Convent School pakhatna an ni a, Marian High School leh Serchhip H/S NCC-te'n an dawt. Assam Rifles-in ralthuam an pho chhuak a, Dog Show buatsaih a ni. Chawhmaah Serchhipa home leh damdawi-inahte ṭanpuina hlan a ni bawk.

LAWNGTLAI

Lawngtlaiah chuan R-Day hi CYLA khelmualah lawm a ni a, district bawrhsap Dr A Muthamma'n hnam puanzar pawt pharhin, parade contingent 24-te'n hnam puanzar chibai an bûk a chhang let.

Dr A Muthamma chuan, NLUP aṭangin Lawngtlai district-a chhungkaw 12,000 chuang hnenah ṭanpuina sem a nih tawh thu te, MGNREGA hnuaiah job card nei chhungkua 28,156 an awm thute a sawi a; Lawngtlai district-a sorkar hnathawh mekte a sawi lang bawk.

Lawngtlaia R-Day lawmnaah hian parade unarmed contingent-ah Downtown English Medium School Scouts & Guides pakhatna an ni a, Model English School Guides leh Don Bosco School Scouts & Guides senior ten an dawt. School contingent-ah Don Bosco School girls pakhatna an ni a, Region HSS girls pahnihna niin, Jehova Jire HSS girls pathumna an ni.

Republic Day puala infiamna lama intihsiaknaa ti hate hnenah lawmman hlan a ni a; R-Day puala Health Worker Award siam chu Vaṭhuampuia health worker V Biaknemi'n a dawng a, Lawngtlai Vengpui Sub-Centre chu centre ṭha berah thlan a ni.

MAMIT

Mamitah chuan GSA khelmualah hman a ni a, Mamit DC Lalbiaksangi'n hnam puanzar pawt pharhin, parade contingent 17-te'n hnam puanzar chibai an bûk a chháng lêt.

Lalbiaksangi chuan, Mamit district-a sorkar hnathawhte sawiin, Tripura aṭanga Bru hruai kir tumnaah November 2-23, 2016 chhungin chhungkua 4,199 endik an nih thu leh chungte chu khaw 48-ah dah tum a nih thu a sawi a; MGNREGA hnuaiah chhungkua 20,537-te tan kum kal mekah inhlawhna ni 14 chhung siamsak a nih tawh thu te, Mamit district-ah TB vei mi 24 leh sikserh vei mi 1,677 hmuhchhuah an nih thute a sawi bawk.

Parade-ah armed contingent pakhat, unarmed contingent 15 leh Mamit MZP pipe band an tel a; school contingent-ah Presbyterian English School girls pakhatna niin, St. Francis of Assisi girls leh JNV School ten an dawt. Mamita a vawi khat nan sorkar department 10-te'n hmalakna leh hnathawhte tableau hmangin an entir a; R-Day inkhawm zawhah DC-in damdawi-in, home leh District Jail-ah thilpek a hlan a ni.

HMUN DANG

Republic Day hi district headquarters ni lo, khua leh hmun dangahte pawh lawm a ni a; Vairengteah chuan SDO Dr Arun T hoa hman niin, parade contingent 13 an awm.

Kawnpuiah chuan hockey khelmualah BDO Melody Ngurthantluangi hoin hman a ni a, parade contingent pariat an awm a; Bilkhawthlirah BDO C Lalduhzuali hoin hman a ni.

Thenzawlah chuan SDO(C) pisa kawtah lawm a ni a, SDO(C) Lalnunmawii'n hnam puanzar a pawt pharh.

Hnahthialah HBSC Ground No. 1-ah lawm a ni a, SDO Lalhruaitluangi'n hnam puanzar a pawt pharh a, parade contingent 12 an awm.

Mizoram University-ah pawh lawm a ni a, MZU vice chancellor Prof. R Lalthan­tluanga'n hnam puanzar a pawt pharh a, MZU-a thawkte leh zirlaite an tel.