CM Hawla'n SIRDPR Complex a hawng
Durtlang Leitana cheng nuai 1707.89 senga din, State Institute of Rural Development and Panchayati Raj (SIRDPR) Complex chu Nilaini tlai khan chief minister Lal Thanhawla'n a hawng.
Chief Minister chuan, SIRDPR complex chu Mizo mipui, a bikin thingtlanga kut hnathawktu leh tualchhung inrelbawlnaa mawhphurna neite tan méllung pawimawh tak a nih thu a sawi a, "He hmuna zirtirna leh intuaihriamnate kal tlangin thingtlang lamah hmasawnna chak zawk a thlen ka beisei a, an tan inzirna hmun pawimawh tak a nih zel theih nan kawng tinréngin a thawktute ṭan la leh zual turin ka duh," a ti.
Ramin zalenna a hmuh hnua sorkar ding tawhte'n thingtlang leh mipui hmasawnna leh an hamṭhatna tur tun thlengin an ngaih pawimawh berte zinga a mi a nih thu sawiin Lal Thanhawla chuan, "Kut hnathawka eizawng hi kan ramah mi 70% vel awma chhût a ni. Kut hnathawh hi eizawnna pawimawh berte zinga a mi a ni," a ti a; kut hnathawktute tel loin sorkar a kal theih loh thu a sawi.
CM Hawla chuan, SIRDPR din chhan ber chu thingtlang mite an changkan zel nana kawng hrang hranga an thiamna tihhmasawn a ni tih sawiin, "An theihnate tihpun a, chu chuan ei leh bar zawnna kawnga an lo ṭhan chhoh nan a ni. Ei leh bar, sum leh paia intodelh hi kan tum ber a ni a, chutiang turin nasa takin sorkarin hma a la a ni," a ti.
SIRDPR complex hawn inkhawm hi Rural Development (RD) secreratry Lalhmingthanga'n a kaihruai a, RD minister R Lalzirliana pawhin thu a sawi.
Complex hawnnaah hian minister Lalsawta, R Romawia, Zodintluanga, John Rotluangliana leh C Ngunlianchunga, parliamentary secretary Lt.Col. ZS Zuala leh Hmungdailova Khiangte, govt. dy. chief whip RL Pianmawia leh PC Zoram Sangliana, MLA te pawh an tel a ni.
SIRDPR complex hi June 26, 2011-ah sak ṭan niin September 30, 2016-ah sak zawh a ni. Campus zau zawng chu sq.metre 6442.62 a ni a; administrative building, guest house, residential hostel, director quarters, dy. director quarters pahnih, faculty quarters paruk, staff quarters paruk leh grade VI quarters paruk a awm.