AMC term tàwp nan ni 15 a la awm Inthlan puan a la ni lo, E.Roll buaipui mek

State Election Commission (SEC)-a commissioner Laima Chozah chuan Vanglaini palai zawhna chhángin, AMC inthlan puan hun tur sawi theih a nih loh thu a sawi a, "Inthlan puan theih a la ni lo. Tunah electoral roll kan la buaipui mek chauh a ni," a ti. 

Vawiin, November 26 aṭanga chhiarin, AMC sorkar term ding lai tàwp hun, Decemebr 10 thlen nan ni 15 a la awm a, chuti chung chuan AMC inthlan hun tur SEC-in a la puang lo. AMC inthlana hman tur electoral roll buaipui mek a la nih avangin, AMC inthlan hi kuminah neih a beiseiawm lo niin thu dawnna pakhat chuan a sawi. 

Municipal council/ corporation chung changa Mizoram sorkarin dan a siam, 'The Mizoram Municipalities Acts, 2007' Section 22-in a sawi angin, AMC term chu kum nga a ni a; chu chu Board of Councillors ṭhutkhawm hmasa ber (first meeting) aṭanga chhiar ṭan tur a ni. First meeting hi AMC inthlan zawh fel hnua sorkar lak luh ní a ni.

Tuna AMC term-a sorkar ding lai hi December 10, 2015-ah lak luh a ni a, an term tàwp hun chu December 10, 2020 a ni. Mayor, deputy mayor leh councillor-te chu khatih laia Aizawl district magistrate Dr Franklin Laltinkhuma'n rinawmna thu tiamtirin a la lut. 

AMC term hmasa ber 2010-2015 chu November 16, 2015-ah a tâwp a, chutih lai chuan AMC term thara sorkar thar din turin inthlan a la ni lo a, sorkar thar din theih a la ni lo. Chuvang chuan, AMC chu November 17, 2015 aṭangin Aizawl District Magistrate-in a enkawl zui a, term thara sorkar a pian ní, December 10, 2015 thleng a enkawl a ni.

AMC dan ang chuan, sorkar term pawhsei theihna dan ziah lan a awm lo a, term a tàwp a, sorkar thar din theih a la nih loh chuan Aizawl District Magistrate (DC)-in a enkawl/ kengkawh tur a nia thu dawn a ni.

Thu dawn danin, state assembly leh Lok Sabha inthlan danah, inthlan puan ní leh inthlan vote thlak ní inkarah ni tla zat tur bithliah a awm a, a tlangpuiin ni 30 aia tlem lo tla tura tih a ni ṭhin. AMC inthlan chungchangah, inthlan puan ní leh vote thlak ní inkarah ni tla zat tur a awm leh awm loh zawhna chhangin, Laima Chozah chuan, hun bithliah chin fel tak a awm vek thu a sawi. 

-    November 16, 2010-ah AMC sorkar hmasa ber lak luh a ni a; chairman-ah CT Zakhuma, vice chairman-ah Zarzoliana, executive councillor-ah Lalzirliana, Lalhuthangi leh Hmingthanzami te lâk luh an ni.

-    July 22, 2014-ah AMC sorkar bûk a ni a, CT Zakhuma kaihhruai sorkar ding lai a tla.

-    July 30, 2014-ah Zarzoliana kaihhruai AMC sorkar thar a piang a; vice chairman Lalrinenga Sailo leh executive councillor (EC)-ah C Lalsawivunga, W Chhuanawma leh Lalmalsawmi te lak luh an ni.

-    Zarzoliana kaihhruai AMC sorkar chu February 10, 2015-ah bûk niin, a tla ve leh.

-    February 12, 2015-ah chairman hmasa ber CT Zakhuma kaihhruai sorkar a piang leh a; vice chairman-ah C Lalsawivunga, EC atan Rosiamngheta, Lalzirliana leh Hmingthanzami te lak luh an ni.

-    Aizawl Municipal Council (AMC) tih ṭhin chu October 15, 2015 aṭangin Aizawl Municipal Corporation tia thlak a ni. Corporation a nih aṭangin chairman leh vice chairman tih ṭhin chu mayor leh deputy mayor tih a ni a, EC tihbo a ni.

-    September 2019-a Legislative Assembly session-ah 'The Mizoram Municipalities (Amendment) Act, 2019' pass a ni a, December 11, 2019-ah Government Gazette-ah chhuah a ni. Dan siamṭhatah EC pali awm thei tura tih a ni a, mi pathum - K Romawia, R Lalbiakthanga leh C Lalthansanga te EC atan September 21, 2020-ah lak luh an ni.