KHAWTHLIR

Social Welfare minister Dr K Beichhua chuan nimin khan State Social Welfare & Rehabilitation Centre, Maumuala mi a tlawh. Minister chuan, Centre-a an ei leh in anmahnia an intum theih nan vawk leh ar an vulh theihna kawng dapsak a tum thu a sawi. Centre-ah hian hmeichhe puitling 51 leh naupang 14, an vaiin mi 65 enkawl mek an ni.

Lai Autonomous District Council (LADC) hnuaia Member of District Council (MDC) inthlanpui, December 4, 2020-a neih turah candidate 72 an awm dawn. MDC atana nomination paper thehlutte inhnuhdawh theih hun November 23, Thawh­ṭanni khan a tàwp a, November 23 khan Sekulh constituency-a independent a chuh tuma hming pe Malsawma Bru chu a inhnuhdawh avangin, mi 72-in an chuh dawn ta a ni.

Vairengte VC hrang hrang, NGO te, Vairengte Khasi Welfare leh Gorkha Association hruaitute November 23 zana ṭhukhawm chuan, an khaw naupang Lalsiamthara thih dan dik tak chhui chhuah ngei an duhzia lantir nan vawiin chawhma dar 11 aṭangin Vairengte khaw pum huap kawngzawh neih an rél. Kawng zawh chhungin dawr zawng zawng khàr tur a ni a, Assam lam aṭanga hnam dang lutte pawh páwna chhuah an remti dawn lo a ni.

National Student's Union of India (NSUI), Mizoram State chuan, MBSE building thar satu tur contractor thlan vek tawh, MNF sorkarin a sût leh tun thlenga sak hna thawh a la ni lo chu hriatthiam harsa an tih thu an tarlang a; a nih tur ang taka sak a nih thuai theih nan hma la turin thuneitute an phût. NSUI hian nimin khan MBSE hotute kâwmin, MBSE building sak tum, kum 2018-a lungphùm phùm tawh chungchang an sawipui a ni.

State Referral Hospital-ah nimin khan Covid-19 vei mi pali dah luh an ni a, mi 10 an chhuak thung a, mi 39 an awm mek; an zingah kum 60 chung lam mi 16 an tel. SRH-ZMC tarlan danin, hripui vei SRH-a enkawl mek zingah ICU-a enkawl an awm tawh lo a, Isolation ward-ah vek an awm. Nimina chhuak mi 10 zingah ICU-a enkawl ṭhin kum 93 mi pawh a tel a ni.