Lunglei Municipal inthlan kuminah Buatsaihtir theih kan tum - Dy. CM

13th May, 2022

UDPA changtu deputy chief minister Tawnluia chuan, kumin chhung ngeiin Lunglei Municipal Council (LMC) inthlan buatsaihtir an tum thu leh inthlan buatsaih a nih theih nan theihtawp an chhuah thu a sawi a, "Ka department chan hnuaia mi a nih angin hmanhmawh luat vanga dai buak erawh ka tum lo," a ti.

Vanglaini palai zawhna chhangin Dy. Chief Minister chuan, LMC chu a rang thei ang bera kaltir duh mah se, dan hnuaiah thil tih ngai a tam avangin hmanhmawh chûk chûk theih a nih loh thu a sawi a, "Tunah hian Lunglei khawpuiah LMC pisa din turin hma kan la mek a ni," tiin, inthlan buatsaih a nih hmain LMC pisa neih a ṭul thu a sawi.

Tawnluia chuan, LMC pisa enkawl turin MCS officer mamawh a nih thu sawiin, "Chumi tur chuan post siam a ngai a, chumi hnuah fill-up (hnawhkhah) phalna neih leh a ngai. Hengte hi chu kan nei tawh. Mahse, direct recruitment ti turin a hmanhmawhthlak tawh si a, deputation-a awm duh tan inhriattirna hun kan hawng mek. Council hnuaia awm tur a nih avangin an remtihna ni loa páwng indah ngawt chi a ni lo," a ti.

Deputy CM chuan, LMC a taka kalpui turin a kalphung a thui tih sawiin, "Dan tê têa thil tih a ngaih avangin hmanhmawh viau mah ila a kal chak theih loh. Tun ang baka kal chak hi chu a har viauin a rinawm. Hmanhmawh luat vanga dai buak ka tum lo," a ti a; thil ṭulte felfai taka ti a, theihtawpa ranga tihfel an tum thu a sawi.

Lunglei khawpuiah village council a awm mek thu sawiin Tawnluia chuan, "Council an nih dawn chuan VC-te hi local council-ah an awm a ngai. VC atana thlan an nih miau avangin LC-ah páwng leh ngawt theih a ni lo. Cabinet-a put luh a, remtih phawtte a la ngai. Hemi atan pawh hian theihtawpa chakin hma kan la mek a ni," a ti.

UDPA Minister chuan, kumin chhung ngeiin LMC inthlan buatsaihtir theih an tum thu sawiin, "Theihtawp chhuahin hma kan la mek a ni," a ti a; thil ṭul angte peih a nih hnuah State Election Commission-ah inthlan buatsaih theih a nih tawh thu an thlen dawn tih a sawi.

Lunglei High Power Committee chungchang zawhna chhangin Tawnluia chuan, "Tun dinhmunah chuan LMC pawh a la ding lo a, HPC chungchang ngaihtuah a la ni lo," a ti a; a taka LMC a kal hunah HPC chungchang chu sorkarin a ngaihtuah tur thuin a lo chhang tawh a ni.

Tarlan tawh angin, November 16, 2021-a chief minister Zoramthanga hoa Council of Minister ṭhukhawm chuan LMC din an remti a; ruahman dan chuan LMC-ah hian ward 11 a awm dawn a ni.