MDC tling tharte lak luh an ni ; Sorkar siam thei an la awm lo
Mara Autonomous District Council (MADC) inthlanpui neih zawh taka MDC atana thlan tlinte chu nimin khan MADC Forest Hall-ah MADC court president K Vanlalliana'n MDC atan a la lut. Hetih lai hian, political party zingah he thu ziah lai thleng hian sorkarna siam thei an la awm lo.
MADC MDC-te ṭhutkhawm hmasa ber tura ruat chu vawiin hi a ni a, ṭhutkhawm hmaa sorkarna siam thei an awm lo a nih chuan thla ruk chhung Governor's Rule-ah awmin, chumi chhung chuan inthlan ṭhat a ni ang.
BJP chuan sorkarna siam theih ngei an inbeisei thu Vanglaini an lo hrilh tawh a, Congress party chuan MNF leh BJP thawhpui an tum loh thu an sawi. MNF adviser Dr K Beichhua pawhin a ṭul chuan opposition ni tura an inpeih thu a lo sawi tawh bawk.
Siaha aṭanga thu dawn danin, party mala sorkarna siam thei an awm loh avangin party tinte chu sorkarna siampui turin an insáwm mek a, he thu ziah lai thleng hian an la insáwm hlawhtling thei lo.
MDC 25 awmna MADC-ah hian sorkarna siam turin MDC 13 neih a ngai a; May 5, 2022-a inthlanah khan BJP-in MDC 12, MNF-in MDC pakua leh Congress-in MDC pali an nei a ni.