Online Excellence Awards sem

Information & Commu­nication Techno­logy (ICT) department chuan nimin khan Vanapa Hall-ah ‘Government Online Excellence Awards 2021-22’ hlanna inkhawm an buatsaih a, Mizo­ram Public Service Commission (MPSC) chu Official Department Website leh Best Online Service Initiatives cate­gory-ah pakhatna a ni.

Khuallian Governor Hari Babu Kambhampati chuan inkhawmah hian ICT buatsaih Web Moni­toring System leh Online Domain Registration System a tlangzarh a; office leh institution 334 aṭanga online IT service hmang ṭha zual thlante hnenah lawmman a sem bawk.

Governor chuan, information technology, internet leh nertworking hmanga engkim thlun zawmna khawvel a nih tawh thu sawiin, "IT hmang thiam leh hmang nasa apiangte khawsak a awlsamin an changkang. Mipui tana awlsam zawka sorkar pisa dawr a nih theih nan IT lamah department-te'n inhmasawnsiak an tum a ngai," a ti a; Mizoram mipuiin an dawn tur scheme-te an la hriat tâwk loh avangin mipui zirtir uar a ṭul thu a sawi.

ICT minister Robert Romawia Royte pawhin thu sawiin, "Sorkar hmalaknaa information dik pek chhuah a nih theihna turin website-te hi uluk taka enkawl a, mipui tana ṭangkai tur information dah hi sorkar department-te mawhphurhna a ni," a ti.

Inkhawmah hian chief secretary Dr Renu Sharma, ICT secretary ni bawk leh sorkar mi pawimawhte an tel a; lawmman chi hrang hrang sem a ni.