District hospital fai ber Lawngtlai DH
Damdawi-in fai inelna, Kayakalp hnuaiah nimin khan Multi-Disciplinary Training Centre, Aizawlah National Health Mission (NHM) buatsaihin Kayakalp lawmman sem a ni. Lawngtlai District Hospital chu kum 2020-21 leh 2021-22 ah district hospital fai ber a ni a, Thenzawl CHC leh Saitual CHC pawhin fai ber lawmman an dawng.
Lawmman semna inkhawma khuallian Health minister Dr R Lalthangliana chuan, lawmman dawngtute a lawmpui thu leh dawng ve lote tan fuihna leh chona ni se a duh thu a sawi a; kum thar aṭangin hriselna kawnga intihsiakna chi khat, dam lohna/natna avanga thi tlem ber district inelna buatsaih a nih tur thu sawiin, "Hei hi mihring cheng zat aṭanga chhut zel tur a ni. Hriselna lamah ṭan kan lak nasat a ngai a, taksa inenkawlnaah tun aia nasa lehzuala ṭan kan lak a ngai," a ti.
Health Minister chuan, Health department-a thawkte chu an pawimawhzia hria a, an hnathawh bakah, ṭawngkam leh cheziaa mite rilru leh taksa damna thlen tum turin a chah a; Health & Family Welfare Board vice chairman Dr ZR Thiamsanga'n thu a sawi bawk.
Kayakalp lawmman hi hripui leng avangin kum 2020-21 khan sem a ni lo a, nimin khan kum 2020-21 leh 2021-22 lawmman sem a ni a, lawmmanah pawisa bakah thuchei leh trophy hlan a ni. Kayakalp hi sorkar laipui kalpui a ni a, kum 2015-ah kalpui ṭan a ni.