Tui tlan nú video thehdarh vanga Police suspend-na sût turin phût

Congress party ṭhalai hruaitute chuan ramri depa police duty-te zinga mi, an tui tlan nu tak video thehdarh avanga suspend leh insawifiah tura tihte thlavang an hauh a, nimin khan inspector general of police (IGP) John Neihlaia an hmu a; police suspend-na sût turin sorkar an phût.

MPYCC tarlan danin, ramri depa Mizoram police duty ṭhenkhatte tui tlan nu tak video thehdarh a nih avangin Hav. Dengthangpuia chu suspend a ni a, mi pathum dang pawh May 13, 2022 hmaa insawifiah tura tih an ni bawk. Video-a lang tui chu Saipum aṭanga km. 20 vela hlaa police-te duty-na hmuna mi a ni.

MPYCC hruaitute hian an president Dr Lalmalsawma Nghaka hoin John Neihlaia an kâwm a, video vanga police suspend tak leh insawifiah tura tihte chungchangah IGP an hmuh chuan rah ṭha a chhuah ngei an beisei thu sawiin, "Pu John Neihlaia pawhin hma a lak tur thu min lo hrilh a ni," an ti.

Assam leh Mizoram ramri buai a reh theih loh avanga ramria duty police-te'n thil lian tham lo taka hrem an tâwk chu vanduaithlak an tih thu sawiin MPYCC chuan, "Ramria police-te duty-na hmun hi ruahtui pawh tla se motor-a tlawhpawh zung zunga siam tur a nih laiin, sorkarin a hnuchhawn tlat hi pawi kan ti hle a ni," an ti a; Mizoram sorkar chu ramria duty-te ngaihsak tur leh tuna suspend tâwk mek leh insawifiah tura kohte chungchanga thupek sut turin Mizoram sorkar an phût a ni.