AR-te'n Aizawl an chhuahsan theih nan Ex-MNA-te'n nawr zel an tum

Ex-Mizo National Army Association (Ex-MNA) hruaitute chuan nimin khan Aizawl Press Club-ah thuthar thehdarhtute an kâwm a; Assam Rifles-te'n Aizawl an chhuahsan hma chuan an nawr zel dawn thu leh AR insawn chungchangah CM Zoramthanga'n dâwt a sawi loh thu an sawi.

Ex-MNA Association president C Zama chuan kum 2019-a Lammuala Chapchar Kût lawmnaah CM Zoramthanga’n 'Kumin May thla hi chuan Assam Rifles-te hi Zokhawsang ramah an insawn tawh ang,' tia a sawi thu sawiin, "Kut béng thâwm pawh a ring hle a nih kha. May thla a ral a, AR-te chu an insawn ta si lo a, mi ṭhenkhatin CM chu dawthei tiin an bei zui a ni," a ti.

Ex MNA President sawi danin, Ministry of Home Affairs-in Assam Rifle Director General, Shillong hnenah Aizawla AR awmte chu Zokhawsanga insawn tura hriattirin, an insawn thu lehkhain May 31, 2019-ah report turin a hriattir a; sorkar laipui hruaitute pawhin Zoramthanga hnenah Aizawla AR awmte chu May 2019-ah Zokhawsanga an insawn tur thu an hrilh a ni.

May 2019 a ral a, an insawn tâk loh avangin MHA-in kum 2020 fûr thlen hma ngeiin Aizawla AR awmte chu Zokhawsanga insawn turin Assam Rifle DG a hriattir leh a, an hunbi tuk chu March 31, 2020 a ni. Mahse, AR-te chu an la insawn duh lo.

Zokhawsanga AR an insawn theih nan kawng ṭha, kawlphetha leh tui tihfel vek a nih tawh thu sawiin C Zama chuan, "Chenna tur in pawh an mamawh zat sak zawh vek tawh a ni a, chenna turin peih vek a ni tawh. Chuti chung chuan battalion hqrs. leh unit ṭhenkhat vawiin thlengin Aizawlah an la awm lui zel a, an chhuah hma chuan kan nawr zel dawn a ni," a ti.