Kawlkulhah RTI Act inhrilhfiah

Mizoram Information Commission leh Kawlkulh Group YMA chuan nimin khan Kawlkulh Town Hall-ah an huam chhunga YMA hruaitute leh zirlaite tan RTI Act chungchang inzirtirna leh zirlaite hma lam hun chungchangah inzirtirna (career guidance) an buatsaih a; chief information commissioner (CIC) Lalnunmawia Chuaungo-in a hmanpui.

Lalnunmawia Chuaungo chuan, sorkara information hriat duh neite tan RTI Act hmangin dil theih a nih thu a sawi a; taimakna leh rinawmna nen lehkha zir a ṭul thu sawiin, "Pathian hre reng chunga theihtawp chhuaha kan hma zawna zirlai awmte zir hi hlawhtlinna bul a ni," a ti.

CIC hian central service leh all India service-a lut tura lehkha zir dan tur te, mahni intodelh thei tura kut themthiam zir dan turte a sawi a, thingtlang lam sikula kalte tan officer lian ni turin a inzir chhuah theih tih hria a, rilru hnual lo turin zirlaite a fuih.

Inkhawm hi Kawlkulh Group YMA president Laldinpuia'n a kaihruai a; YMA hruaitute bakah, Kawlkulh HSS, Kawlkulh H/S, Kawlkulh PES, St. Joseph H/S Kawlkulh, Dulte H/S, Chhawrtui H/S leh Vanchengpui H/S-a zirlaite an tel. Mithiamte'n thupui an sawi bakah, Central YMA vice president Lalhmachhuana'n YMA kumpuan a sawi a ni.