Lunglei dist-ah 2021 chhungin NDPS Act thubuai 33 a awm

Lunglei district bawrhsap Kulothungan A hoin nimin khan DC conference hall-ah District of Narco Coordination Centre (NCORD) an ṭhu a; kum 2021-22 chhungin NDPS Act hnuaiah thubuai 33 a awm thu leh Food & Drug Administration-in damdawi dawr tinah CCTV vuah vek tura an tih thu tarlan a ni.

Bawrhsap chuan, Lunglei district-ah ruihhlo a hluar tih sawiin, "Ruihhlo ti tam zawk hi tleirawl leh rawltharte an ni a, ruihhlo laka kan inven theih nan a kaihhnawih state leh central sorkar hnathawkte thawhhona ṭha neih a ngai," a ti a, ruihhlo do kawngah mi tin ṭan rual a pawimawh thu a sawi.

Ṭhutkhawmah hian ruihhlo chhui chhuak thei khawl leh mamawh ang khawl neih dan tur leh de-addiction leh rehabilatation vil leh enkawlte an sawiho a; Food & Drug Administration-in damdawi zawrhna dawr tinah CCTV vuah vek tura tih a nih thu tarlan a ni bawk.

Lunglei district-ah hian Police department-in NDPS case kum 2021-ah pahnih leh kum 2022-ah pakhat an nei a, Excise & Narcotics department-in kum 2022 chhungin case 30 an nei thung.

Ṭhutkhawmah hian Police, Excise & Narcotics, BSF, Food & Drugs Administration, School Education, Agriculture leh IPR department aiawhte an tel a ni.