District pathumah hripui vei an awm rih lo

May 11, Nilaini khan Mizoramah Covid-19 vei mi 55 hmuh chhuah a ni a, a záwnin ni li chhung chu a tam tial tial. Nimin khan hripui vei dam tawh mi 40 chhuahtir an ni a, district pathumah hripui vei an awm rih lo. Nimin khan hripui vanga thi an awm lo a, ni 10 chhung thi an awm tawh lo.

Nilainia Covid-19 vei hmuh tharte chu mipa 23 leh hmeichhia 32 an ni a, TrueNAT hmanga hmuh pakhat leh RAT hmanga hmuh 54 a ni. Positivity rate chu 12.09% a ni a, a hma ní aiin a sang leh hret.

Covid-19 positive hmuh tharte hi district palia mi an ni a, district khawpuia mi paruk chiah telin, a bak mi 49 chu district khawpui páwn lama mi an ni. Mi 55 zinga a zatve aia tam, mi 36 (65.45%) chu Saitual district-a Lènchím khaw mite an ni bawk.

IDSP record angin, Mizoramah Covid-19 vei 2,27,849 hmuh chhuah a ni tawh a, mipa 1,06,095 leh hmeichhia 1,21,754 an ni a, mipa aiin hmeichhia 15,659-in an tam zawk. Nimin tlai dar 5 thleng khan mi 2,26,983 (99.62%) chhuahtir an ni tawh a, mi 697 (0.31%) thi tawhin, enkawl mek mi 169 (0.07%) an awm.

Ni kaw chhung a záwnin Mizoramah Covid-19 vanga thi an awm tawh lo a, thi an awm hnuhnun ber chu May 2, 2022 kha a ni.

Mizorama district 11 zingah Saitual district-ah hripui vei enkawl lai 69 awmin, a tamna ber district a ni a; Kolasib, Lawngtlai leh Hnahthial district-ah hripui vei an awm rih lo a, Champhai, Siaha leh Khawzawl district-ah positive enkawl mek mi 10 aia tlem ṭheuh an awm mek.