KHAWTHLIR

Thisen pe
Nimin khan Champhaia GM Higher Secondary School NSS volunteer-te chuan thisen pek rûnpui an huaihawt a, mipa 27 leh hmeichhia 13-te'n Champhai District Hospital tan thisen unit 40 an pe. School of Nursing, Thingdawl pawhin International Nurses Day pualin Kolasib District Hospital tan thisen unit 22 an pe a, petute hmeichhia 18 leh mipa pali an ni.

Covid-19 sawiho
Disaster Management & Rehabilitation secretary H Lalengmawia hoin nimin khan district tina Task Group on Monitoring of CAB & Covid-19 Restrictions chuan video conference kaltlangin Covid-19 dinhmun, an hmalakna leh hmachhawpte an sawiho.

Home enfiah
Kolasib Child Protection Committee chuan nimin khan an chairman John LT Sanga, bawrhsap hoin Kolasib-a kohhran enkawl Khuangpuilama Audrene Scism Children’s Home leh Vengthara Enna In-te an tlawh a, an dinhmun leh naupang enkawlna kalpui dan an enfiah. Home pahnihah hian naupang 42 enkawl mek a ni.

JSS training hawng
Jan Shikshan Sansthan (JSS), Ministry of Skill Development & Entrepreneuship hnuaia Mission Foundation Movement (MFM)-in Mamit district tana training an buatsaih chu Mamit bialtu MLA H Lalzirliana'n nimin khan a hawng. Training-ah hian mi 900 vel an inzir chhuak a, zirlai chhuakte hnenah H Lalzirliana hian certificate a hlân a ni.

AMFU khawmpui
All Mizoram Farmers Union (AMFU) chuan nimin khan MC Hall, Durtlangah inkhawmpui an hmang a; khuallian Agriculture minister C Lalrinsanga chuan, Mizoram economy a vei avangin agriculture-ah a tui thu a sawi. AMFU inkhawmpui hi an pawl senior vice president Prof. Chawngkhuma Chawngthu-in a kaihruai a, an president Joseph H Thanzuala pawhin thu a sawi a ni.

Nurses Day
Aizawl West-III bialtu MLA VL Zaithanzama chuan nimin khan Blessino Nursing School-in an Assembly Hall-ah International Nurses Day an hman a hmanpui a, Mizo nurse-te chu India rama nurse ṭha ber an nih thu a sawi.