NIAS-a zirlai tirh chungchangah LEIT Director hlui suspend a ni dawn Sorkar-in a tih tur a ti zel ang - HM Zira
Nalanda Institute of Advance Studies (NIAS), Kolkata nena Memorandum of Understanding (MoU) ziah leh Mizo zirlai 32 tirh chungchangah, Mizoram sorkar chuan Labour Employment & Industrial Training (LEIT) director hlui, tuna sorkara additional secretary ni mek Rotluanga a suspend dawn niin Vanglaini chuan thu a dawng. NIAS kaihhnawihah hian sorkarin a tih tur a tih zel tur thu Home minister R Lalzirliana chuan a sawi.
Rotluanga hi NIAS, Mizoram Building and Other Construction Workers Welfare Board (MBOCWWB) leh Mizoram Youth Commission (MYC) ten MoU an ziah laiin LEIT Director a ni a, LEIT Director chu MBOCWWB-ah Secretary a ni nghal a; inremnaah pawh Rotluanga hian MBOCWWB secretary a nihna angin hming a ziak a ni.
Vanglaini palai zawhna chhangin chief secretary Lalmalsawma chuan, LEIT Director hlui hi suspend tura thil ṭulte tihfel a nih vek tawh thu a sawi a, "Order buaipui mek a ni a, a la chhuak loin ka hria," a ti. Vanglaini palaiin Chief Sceretary a kawm hun hi nimin chawhnu dar 1:45 vel a ni.
Home minister R Lalzirliana chuan nimin khan Congress Bhavan-ah thu sawiin, NIAS-a zirlaite tirh an nihnaa thil dik tâwk lo awmte chu sorkarin a hria tih a sawi a, "Tih tur ṭul chu sorkarin a hria a, a tih tur a ti ang. Nakin lawkah a tih tur hmasa a ti dawn a, tih zel a ngaih pawhin a ti zel dawn. He thil thleng hi sawi sawi a ṭul tawh lo," a ti.
Home Minister sawi danin, sorkar tan sorkar hnathawkte chu an hnuaia thawk an nih avang ngawtin duh duha suspend leh bàn ngawt chi a ni lo a, dan hnuaiah thil tihfel ngai tam tak a awm a ni.
Minister-te zin hlâna thil lo tihfel pawh a awm ve ṭhin thu sawiin R Lalzirliana chuan, "Zin hlânin Chief Minister hnenah charge kan pe ṭhin a, Chief Minister a zin ṭum pawh a awm ṭhin. Thil zawng zawng minister haw hun nghak a, a en tura tih a nih chuan mipuiin an tuar dawn. Chuvangin, minister awm loh hlana thil lo tihfelte pawh a awm ve ṭhin," a ti.
LEIT minister Lalrinmawia Ralte chuan, "He thil thleng chungchang hi Home Minister-in sorkarin a hria a, sawi a ṭul tawh lo a tih ang khan, duhtâwk mai a ṭha," a ti a; he thil thlengin sawi zui a hlawh laia Aizawla a awm loh chhan chu official programme a duan sa anga hun a hman vang a ni tih a sawi.
NIAS, Kolkata-a Bachelor of Hotel Management (BHM) zir tur thlanna atan MBOCWWB Secretary-in August 6-8, 2014-ah Vanglaini chanchinbuah advertisement a chhuah a, LEIT Director pisaah interview neih a nih hnuah mi 32 thlan a ni. Zirlai 32-te chu August 29, 2014-ah thlahna hun hmanpui a ni a, September 3, 2014-ah Aizawl an chhuahsan.
NIAS hian inremna an ziah anga thil an kalpui loh bakah, NIAS chu West Bengal sorkarin zirna in lema a puante zingah a tel. Hetiang a nih avang hian zirlai eng emaw zat chu an kal zawm duh lo a, zirlai 32 zingah hian tun dinhmunah chuan final year exam thei mi pariat chiah an awm tawh.
Zirlai zinga mi C Lalthanmawia chuan NIAS, Kolkata an thlen tirh aṭangin an kal hmaa an sawi nen thil awm dan a inang lo hle tih a lo sawi tawh a, "Hostel nuam tak an website-a an tarlan laiin, a takah chuan room chêp takah mi pathum/palite min khung khawm a, study table pawh a awm lo. Chaw eina pindan a awm lo a, in chung záwlahte chaw kan ei mai ṭhin," a ti.
RTI Act hmanga zawhna chhaannaa a lan danin, NIAS hi zir chiang hmasa loin August 4, 2014-ah MoU ziahpui a ni a, inremna ang chuan zirlai 32 zirna senso atan cheng nuai 128.20 ruahman a ni.
Inremna ziah tûk, August 5, 2014-ah NIAS hnenah first instalment Rs. 66,09,900 pek a ni a; zirlai 32-te thlah liam an nih hnu lawk, September 15, 2014-ah second instalment Rs. 4,40,660 leh September 16, 2014-ah Rs. 57,68,640 pek a ni bawk. Pawisate hi MBOCWWB Secretary hminga pek ṭhin a ni.
Cheng nuai 128.20 hi dan loin MBOCWWB aṭanga pawhpên a ni a, sumte hi building leh construction work hrang hranga hna thawkte leh an fate hamṭhatna atana hman tura tih a ni.