SSA sum tur nuai 7,228 hmuh a ni

Sorkar laipuia Ministry of Human Resource Development (MHRD) chuan, nimin khan Mizoram SSA sum tur cheng nuai 7,228 a pe chhuak.

School Education department enkawltu minister H Rohluna leh parliamentary secretary Joseph Lalhimpuia te chuan nimin khan New Delhi-ah MHRD hotute dawrin, SSA sum tur an buaipui a; MHRD hotute chuan H Rohluna hnenah cheng nuai 7,228 sanction order an lo pe a ni.

School Education department hotute hnen aṭanga thu dawn danin, H Rohluna leh Joseph Lalhimpuia te hian January 25, 2017 khan HRD minister Prakash Javadekar chu a pisaah an hmu a; Mizoram SSA-a thawkte'n kum 2016-17 hun rei tak hlawh an lak theih tawh loh thu hrilhin, SSA sum pe chhuak thuai turin an ngen a ni.

MHRD secretary Anil Swarup pawh kawm lehin, HRD Minister hnena an thu thlente a hlawhtlin theihna atana ṭan lak pui turin an ngen a ni.

School Education department thuchhuah chuan, SSA sum pek chhuah chungchangah state sorkarin a tih tur a tih vek tawh hnuah sorkar laipuiin sum a pek ve tur (central share) a pek mai loh avangin SSA-a thawkte'n hun rei tak hlawh an la thei lo chu pawi an tih thu a tarlang a, "Minister H Rohluna'n New Delhi-ah SSA sum hi pe thuai turin MHRD thuneitute a nawr a, sanction order hi an lo pe ta a ni," a ti.

School Education Minister hian CSS hnuaia Hindi zirtirtute hlawh tur pawh pe thuai tur leh an thawh hun pawh kum 10 dang pawhseisak turin MHRD hotute a ngen a ni.