Inrûkbo thubuaiah thutlukna siam
November 23, 2013-a NLFT leh Bru misual nia puhte'n Lalzamliana, Republic Veng, Sanglianthanga, Mamit leh Deep Mondal, West Bengal-te an rûkbo thubuaia Mizoram police-te'n an man zinga mi pathumte thubuai pakhat chu chinfel a ni.
Police-te'n an puhna ṭhenkhat chu Court-in finfiahna awm loa a hriat avangin, kum hnih leh thla li ṭheuh táng tur leh Rs. 4,000 chawi turin a hrem.
Inrûkbo thubuaiah hian Mizoram police-te'n Dhaniram Reang (42), Endromsha (22), Zorama @ John (22), Rotan Reang @ Mawia leh Chhandama (18) te an man a. Chhandama hi bail chhuah a nih laiin a tlanbo a, man a la ni lo a; Rotan Reang erawh chu rûkbote'n anmahni rûkbonaah a tel loh thu an sawi avangin thubuai a nei zui lo.
Rubotute ukil hnen aṭanga thu dawn danin, Mizoram police-in an mante hi rubotute mi chhawr leh chhawng an ni a, tui chawiahte an hmang ṭhin.
Aizawl District Court-a additional session judge Vanlalenmawia chuan thubuaiah hian thutlukna siamin, Mizoram police-te'n rubotua an puhte IPC Section 364 (A)/379/34 (dam chhung tàn theihna) hmanga thubuai an siamsaknaah chuan finfiahna awm loah a ngai a; Dhaniram Reang thubuai bik, insawisaknaa inhnamhnawiha an puhnaah pawh police-te'n finfiahna nei loah a ngai bawk.
Hetih lai hian, mi rukbonaa inhnamhnawiha an puhnaah erawh police-te chu finfiahna neiah Judge chuan a ngai. Court chuan finfiahna aṭang leh thuhretu hrang hrangte thusawi aṭangin Dhaniram Reang, Endromsha leh Zorama te chu kum hnih leh thla li ṭheuh táng tur leh Rs. 4,000 chawi turin a hrem a ni.
Heng mi pathumte hi kum hnih leh thla li an tàn tlin tawh avangin he thubuai bikah hi chuan an tàn a ngai tawh lo a; thubuai dang pahnih an la neih avangin jail aṭangin an la chhuak thei lo thung.