Lily Veng CDC-in Nepal-ah làm entir

Lily Veng Cultural & Drama Club, Aizawlte chuan January 19-26, 2017 inkar khan Nepal rama hmun hrang hrangah Mizo hnam lam leh zaite an entir a, Mizorama rawn haw turin nimin khan Nepal khawpui Kath­mandu an chhuahsan.

Lily Veng CDC-te hi January 18 khan Art & Culture minister R Romawia'n a thlah liam a; January 19-ah Kathmandu an thleng.

January 20-ah Kath­mandu-ah an pualin prog­ramme buatsaih a ni. January 22-ah Dharan-ah, January 24-ah Biratnagar-ah, January 26-ah Kathmandu-a Indian Embassy-ah Mizo hnam lam an entir a; an làm apiangin Solakia, Chawnglaizawn leh Cheraw an entir ṭhin.

Lily Veng CDC-te hi Mizorama cultural club zinga Ministry of external Affairs hnuaia Indian Council for Cul­tural Relation (ICCR) em­panelled artiste awm chhun an ni a; Nepal-a an zinna senso pawh ICCR-in an tumsak a ni.

Lily Veng CDC hruai­tute chuan, an club chu ICCR-in India ram hnaih deuha awm ram dangte pawh la fang zel turin an ruahman a, a hnaivai deuhah chuan Myanmar leh Australia fang turin ruahmanna siam mek a nih thu an sawi.