COVID-19: Mizoram dinhmun Hripui vei 35 hmuh belh a ni

November 24, Thawhlehni khan Mizoramah Covid-19 vei mi 35 hmuh chhuah an ni a, nimin khan hripui laka fihlîm tawh mi 21 chhuahtir an ni thung.

Covid-19 vei hmuh chhuahte chu mipa 23 leh hmeichhia 12 an ni a; ZMC laboratory-a hmuh mi panga, TrueNAT-PCR hmanga hmuh mi 10 leh, Rapid Antigen Test (RAT) hmanga hmuh mi 20 an ni.

Nimin khan hripui laka fihlim tawh mi 21 chhuahtir an ni a; SRH-ZMC aṭangin mi 10, Durtlang BSUP CCC aṭangin mi paruk, MLA Hostel CCC aṭangin mi pakhat leh Mamit CCC aṭangin mi pali an chhuak.

Mizoramah Covid-19 positive mi 3,745 hmuh chhuah a ni tawh a, mipa 2,770 leh hmeichhia 975 an ni. Nimin tlai dar 5 thleng khan mi 3,319 (88.62%) chhuahtir an ni tawh a, mi panga (0.13%) thi tawhin, enkawl mek mi 421 (11.24%) an awm.

November 23, Thawhṭanni chhùna thi R Hrangthanga (40), Thenzawl Vengchhak chu a thih hnuah Covid-19 positive tih finfiah leh ni mah se, Covid-19 vei thi anga chhinchhiah a ni lo.

Covid-19 positive hmuh tawh mi 3,745 zinga mi 1,736 chu Mizoram chhunga kái an ni a, mi 2,009 chu state páwn aṭanga rawn lût an ni.

November 24, Thawhlehni khan Mizoramah swab sample 1,554 endik a ni a, chu'ng aṭang chuan Covid-19 positive mi 35 an hmu chhuak. Swab sample endik dan chu - ZMC laboratory-ah mi 371, TrueNAT-PCR hmangin district pakuaah mi 302 leh RAT hmangin district 10-ah mi 881 an ni.

Sorkar thuchhuah tarlan danin, ZMC laboratory-a hripui hmuh chhuah tharte chu mipa pathum leh hmeichhia panga, puitling vek an ni a; state páwn aṭanga tun hnaia rawn lut vek niin, tualchhunga kái an awm lo.

ZMC-a hmuh tharte chu - Maubawka hmeichhia pahnih, Assam leh Manipur aṭanga rawn haw te, Chanmari, Aizawla mipa pahnih, Customs-a thawk, Meghalaya leh Delhi aṭanga rawn lutte leh, Zokhawsanga awm Assam Rifles pakhat, Bihar aṭanga rawn lutte an ni. An vaiin quarantine facility-a awm lai an ni a, symptom nei lo vek an ni.

TrueNAT-PCR hmanga hmuh chhuah mi 10-te chu mipa puitling vek, state páwn aṭanga rawn lut vek bawk an ni a; Police Training School (PTS), Thenzawla police pariat leh Serchhip Dawngzawla awm BSF sipai pahnih an ni. An vai hian tun hnaia Bihar Assembly inthlana duty zo rawn haw, anmahni hmuna khung hran mek vek an ni a, symptom nei an awm lo.

RAT hmanga hripui vei hmuh chhuah mi 20-te chu mipa leh hmeichhia 10 ve ve an ni a, naupang kum 4 leh kum 7 mi leh, tleirawl kum 15 mi telin, a bâk zawng puitling an ni. Mi pali chu Aizawla hmuh chhuah an ni a, mi 16 chu Lawngtlai khawpui chhunga mi vek an ni thung.

RAT hmanga hmuh mi 20 zinga mi 19 chu Mizoram chhunga kái an ni a; mi pakhat - Zotlang, Aizawla mipa kum 56 mi erawh chu Delhi aṭanga rawn haw a ni thung a, symptom nei a ni.