NIAS nena MoU ziaha mawhphurtute February 3 ral hmaa hrem an phût

MZP leh MSU-te chuan, Nalanda Institute of Advance Studies (NIAS), Kolkata nena inremna thuthlung ziah leh NIAS-a Bachelor of Hotel Management (BHM) zir tura Mizo zirlai 32 tirhnaa a mawhphurhtute chu February 3, 2017 ral hma ngeia hrem turin Mizoram sorkar an phût a; an hum tiam chhunga hrem an nih loh chuan a ṭul anga an bawhzui dawn thu an puang.

MZP leh MSU hruaitute chuan nimin khan Aizawl Press Club-ah thuthar thehdarhtute kâwmin, NIAS, Kolkata-a Mizo zirlai 32 tirh dana an thil chhui chhuahte an sawi a; dik lo taka thil titute February 3 ral hmaa hrem an nih loh chuan Labour, Employment & Industrial Training (LEIT) Minister, Mizoram Youth Commission (MYC) Chairman leh Mizoram Building & Other Construction Worker Welfare Board (MBOCWWB) pisa kai turte dan an tum tih an puang.

MZP leh MSU-in an chhuinaa chairman Vanlaltána, MZP vice president chuan, MBOCWWB leh NIAS-in MoU an ziah chu Welfare Board Committee kaltlang lo leh MBOCWWB chairman Lalrinmawia Ralte, LEIT minister pawmpuina tel loa ziah a nih thu a sawi a, "Institution hi zir chianna mumal nei loin induhsakna uchuak tak hmanga MoU ziahpui an ni," a ti a; sum inpek dante a sawi.

NIAS-a zir tur thlanna atana advertisement leh interview neih dan pawh a rinhlelhawm hle tih sawiin, Vanlaltána chuan, "Advertisement hi hetih hun laia MBOCWWB Secretary-in Vanglaini chanchinbuah August 6-8, 2014 khan a chhuah a ni. Interview-ah MBOCWWB Secretary leh NIAS chairman Mainak Saha te pahnih chauhin LEIT Director office-a an conduct dan aṭang pawh hian thil dik lo tih tumna a awm ngeia rin a ni," a ti.

Vanlaltána chuan, MoU-ah MYC/WWB tih veka a inziah bakah, thuhretu (witness)-ah MoU ziah laia MYC Superintendent a ṭan avangin, MYC chairman T Sangkunga'n MoU chu hriatpui lo mah se, MYC-a mi tu emaw chu a tel ngei tih a sawi a, "MYC hian an hriatpui lo tak tak a nih chuan, MYC Superintendent hi a inhnamhnawih ve ngeiah kan ngai," a ti.

MZP Vice President sawi danin, MYC Chairman chuan MoU ziah dan an hriat chian hnuah August 14, 2015-ah MoU tihtawpna lehkha NIAS Chairman hnenah an thawn tih a sawi.

Vanlaltána chuan, NIAS zir chianna awm hmasa lo leh mi tlemtê chauhin an hriatpuinaa MoU ziah a ni te, awlsam taka zir man tur cheng nuai 128.20 an pek tlak nghal danah te, zirna in rintlak tam tak a awm laia a sawngnawi ber mai an thlan dan leh NIAS-in MoU a palzût ngam danah thil dik lo a awm ngeia an hria thu a sawi a, "MoU hi Board Chairman, Minister ni bawkin a hriatpui loh laia Secretary-in cheng nuai 128.40 sênna leh zirlaite hma lam hun chhiat ṭhak theihna ni si ama thua a ti ngam hi a mak kan ti a, tun thlenga hrem a ni lo hi kan hrethiam lo hle," a ti.

Zirlai pawl hruaitute chuan, tun hnuah NIAS-a thil thleng ang a thlen tawh loh nan, hmun danga zirlai leh hna thawk tura intirh chhuah chungchangah dan mumal zawk neih an duh thu an sawi a; nimin khan chief minister Lal Thanhawla an hmu a, an thil hmuh dan leh an phûtte an hrilh tih an sawi bawk.

MZP-MSU thil phûtte
1) MoU ziah laia MBOCWWB secretary Rotluanga, MCS dan anga hrem.
2) MoU-a hriatpuitu MYC superintendent Lalsawmzuala dan anga hrem.
3) MBOCWWB chairman Lalrinmawia Ralte, minister of state leh MYC chairman T Sangkunga, MLA-te an chanvo hneh loah an ngai a, dik tak leh felfai taka hna thawh a nih theih nan an chunga action lak.
4) A pung awm loa MBOCWWB sum mimal hnena pûktir tawhte rûl leh vek.
5) MBOCWWB sum pûktir chu dan loa tih a nih chuan a mawhphurtute hrem.