Apollo-a nurse zir turte la lut
Apollo School of Nursing chuan, nimin khan Synod Conference Centre-ah nurse zir thar turte lak luhna hun, 12th. Capping & Lamp Lighting Ceremony an hmang a, Health minister Lal Thanzara'n a hmanpui.
Lal Thanzara chuan, nurse hna chu hna zahawm, damlo leh enkawl mamawhtute tana nun hlanna, rawngbawlna ropui tak a ni tih a sawi a; nurse zir turte chu an thutiamte hre reng a, chi leh hnam, mipa leh hmeichhia, sakhua, rethei leh hausate thliar loa theihtawp chhuah a, missionary thinlung pu tlat chunga thawk turin a fuih.
Health Minister chuan, nau piang hlim thihna leh nunau chunga thi zat tehna IMR leh MMR tihhniam chu sorkarin a ngai pawimawh tak zet tih sawiin, "Hemi atan hian doctor, nurse leh medical lama hna thawkten mawhphurhna sang tak an nei a, thawk tura inbuatsaih zirlaite pawhin an ngai pawimawh ka duh hle," a ti.
Apollo School of Nursing hi August 2005-ah Sacred Heart Society hnuaiah din a ni a, Indian Nursing Council leh Mizoram Nursing Council-in an pawm a ni. Mi 191 an zir chhuak tawh a, kum tin zirlai thar 30 an la ṭhin. Zirlai 126 an nei mek a, teaching leh non-teaching staff 37 an thawk mek a ni.