NFBS dawng tur thlang

National Social Assis­tance programme (NSAP) hnuaia scheme pakhat, National Family Benefit Scheme (NFBS)-a ṭan­puina dawng thei tur thlangin District Level Committee for Imple­men­tation of NSAP Scheme chu nimin khan Kolasib DC conference hall-ah an ṭhukhawm a; parlia­mentary secretary K Lalrinthanga'n a hmanpui.

NFBS hnuaiah hian Kolasib district-ah mi 15 hnenah ṭanpuina Rs. 20,000 ṭheuh pek turin sorkar laipuiin sum a rawn pe a, Mizoram pum tan chuan mi 197 hnena pek tura ruahman a ni. Meeting chuan, Bilkhawthlir ICDS hnuai aṭangin mi pariat leh Thingdawl ICDS hnuai aṭangin mi pasarihte hnenah ṭanpuina pek turin thutlukna a siam.

NFBS hnuaiah hian district tina ṭanpuina dawng thei zat chu kum 2011 chhiarpuia district-a mihring awm zat aṭanga chhût a ni. Ṭanpuina hi chhungkuaa eizawngtu ber kum 18 aia naupang lo leh kum 59 aia upa lo a thihin, a kalsan tâk a thawhchhuah ringtute'n Social Welfare department-ah dil theih a ni a, BPL chhungkua an ni tur a ni.