SA-in Aizawl-Sàwleng kawng an zawh dawn

Salvation Army (SA), India Eastern Territory chuan, February 1-4, 2017 chhung khian an din champha kawm 100-na, centenary lawm nan Aizawl aṭanga Sàwleng thleng kea kal, March of Witness Centenary Prayer Walk an huaihawt dawn tih an sawi.

March of Witness Centenary Prayer Walk huaihawt tur chung­changah hian Salvation Army-a Centenary Celebration Prayer & Councelling Sub-Committee hruaitute chuan nimin khan Aizawl Press Club-ah thuthar thehdarhtute an kâwm. Sub-Committee secretary Nuhliri Khiangte chuan, kawngzawha tel tur hian SA member zawng zawng an sáwm tih a sawi a, kohhran dang mi ṭhenkhat kal tum an awm tih sawiin, lawmawm an tih thu a sawi.

Nuhliri Khiangte sawi danin, March of Witness Centenary Prayer Walk nei tur hian February 1 chawhma dar 10-ah India Eastern Territory head­quarters, Tuikual aṭangin Territorial Commander-in a thlah liam ang a; Aizawl leh Sawleng inkarah zan thum riakin, February 4-ah Sawleng hman an tum a ni.

Aizawl aṭanga kawng­zawhna atana Sawleng an thlan chhan chu, Mizorama SA mi hmasa, an awmna aṭanga hnawhchhuahte'n an pana an awm khawmna hmun a ni tih sawiin, Nuhliri chuan, "He lai hmun hi Holy Land tia vuah a ni a, hemi thleng hian kawng zawh tum a ni," a ti.

Zawhna chhangin Centenary Celebration Prayer & Councelling Sub-Committee chairman Maj. ST Dula chuan, Salvation Army kum 100-na lawmna pual hian kum 2015-a an kohhran aṭanga chhuaka kohhran thar din tawhte nen an inpumkhat leh theih nan leh Salvation Amry-a an luh leh theih nan hma an lak thu a sawi.