La inthurual ngai lo
January 19, 2017-a chhuak Vanglaini-a tarlan, Kulikawn police-in 9mm. Glock pistol leh a neitua puh an man chungchanga hming lang ve C Lalnunmawia, Mission Veng leh a ukil chuan a mawhphurtua bera ngaih Lalawmpuia, Sateek nen tun hmain inthurualna an la nei ngai lo tih ziakin Vanglaini an hrilh.
Ukil Lalbiaknunga Hnamte-in lehkhaa an ziah danin, C Lalnunmawia leh Lalawmpuia te hi police-in an man chhannaah tih loh, thil dangah tun hmain an la inthurual ngai lo a, C Lalnunmawia chu lirtheia sumdawng ni mah se, a sumdawnna thilah tun hmain Lalawmpuia nen thil an la ti dun ngai lo a ni.
Aizawl South SDPO, F Lalbiakzauva sawi danin, Lalawmpuia hi motor hralh chungchanga mi bum kaihhnawihah Kulikawn police-in an man a, chumi kal zelah chuan C Lalnunmawia pawh January 17, 2017-ah man a ni. C Lalnunmawia hi police-in an man ní-ah vêk bail-a chhuah nghal a ni a; Lalawmpuia chu jail-ah a táng mek thung.