Hripui vei hmuh thar 35 zingah tualchhunga kái 19 an awm
November 24, Thawhlehnia Mizorama Covid-19 vei hmuh chhuah mi 35 zingah Mizoram chhunga kái chhâwng mi 19 an awm a, Aizawl leh Lawngtlai khawpuia mite an ni.
Sorkar thuchhuah aṭanga a lan danin, hripui vei hmuh thar zinga tualchhunga kaite chu Aizawla veng pathuma mi pakhat ṭheuh leh, Lawngtlai khawpui chhung veng palia mi 16 an ni a; RAT hmanga hmuh chhuah vek niin, ZMC laboratory leh TrueNAT-PCR-a hmuh zingah tualchhunga kai an awm lo.
Tualchhunga kái mi 19 zinga pahnih chu an kài ṭanna hriat loh an ni a, mi dang 17 chu an kaina hriat theiha ngaih a ni. Mi 19 zingah natna (Covid-19 symptom) lang chhuak mi pariat an awm bawk.
Lawngtlai district-ah hian Covid-19 positive enkawl mek mi 87 an awm nia thu dawn a ni.
Hetih lai hian, ZMC-a hmuh chhuah panga zinga pakhat leh TrueNAT-PCR hmanga hmuh chhuah mi 10, an vaiin mi 11-te chu Bihar Assembly inthlana duty zo rawn haw an ni a; Police Training School, Thenzawla awm police pariat, BSF sipai pahnih leh Assam Rifles sipai pakhat an ni.