2016-ah CID-in lirthei bo report 131 an dawng

Mizoram police-a CID (Crime) chhinchhiah danin, kum 2016 chhung khan Mizoramah lirthei rûkbo report 131 a awm a, Aizawl district-ah lirthei rûkbo a tam ber. Lirthei rûkbo zinga 104 chu two wheeler a ni.

Lirthei rûk bo tamna ber Aizawl district-ah chuan report 104 a awm a; bike 48, scooter 38, auto-rickshaw pali leh lirthei ke li nei 14 a bo tih report a ni. Lunglei district-ah chuan motor panga bo report a awm a, chungte chu scooter pakhat, bike pathum leh auto-rickshaw pakhat a ni.

Kolasib district-ah lirthei panga bo report a ni a; scooter pahnih, bike pakhat, auto-rickshaw pakhat leh lirthei ke pali nei pakhat a ni. Lawngtlai district-ah scooter pakhat, bike pathum leh ke pali nei chi pakhat bo an report a; Siaha district-ah pawh scooter pahnih, bike pakhat, auto-rickshaw pakhat leh ke pali nei pakhat a bo report a awm.

Mamit district-ah bike pakhat leh ke pali nei pahnih bo report a ni a; report luh tlemna ber, Serchhip district-ah chuan bike pahnih a bo thu report a ni.

Kum 2016 chhunga lirthei bo report zawng zawng chu bike 60, scoo­ter 44, auto-rickshaw pariat leh lirthei ke pali nei 19 a ni a, a vaiin 131 a ni.