Rotluanga, MCS suspend a ni

Mizoram sorkar chuan, kum 2014-a Nalanda Institute of Advanced Studies (NIAS), Kolkata leh Mizoram Building and Other Construction Workers Welfare Board (MBOCWWB)-in thawh dunna thuthlung (MoU) an ziah laia MBOCWWB secretary, Rotluanga, MCS chu a chawlhtir (suspend).

Rotluanga hi tunah Mizoram sorkarah additional secretary a ni mek a, NIAS Kolkata leh MBOCWWB ten MoU an ziah laiin Labour, Employment and Industrial (LEIT) director a ni a, LEIT Director a nihna angin MBOCWWB Secretary a ni nghal a; MoU-ah pawh MBOCWWB aiawhin hming a ziak a ni.

Rotluanga suspend-na thupek hi January 27, 2017 tlai khan Mizoram sorkara principal secretary Renu Shar­ma-i'n a tichhuak a; suspend a nih chhungin thuneitu sang zawkte remtihna loa Aizawl chhuahsan lo tura tih a ni.