BSF-in civil mi an rîkrâp: Tlabung MZP

MZP sub-head­quarters, Tlabung chuan thuchhuah siamin, January 27, 2017 chhun dar 12 vel khan Tablabagh khuaa ramri vengtu sipai ṭhenkhat zu rùiin tualchhung mite rîkrâpin, silai an lek khum niin an tarlang a; pawi an tih thu leh an dem thu an sawi.

Tlabung MZP tarlan danin, January 27 chhun dar 12 velah ramri hungna tur hmanraw phurtu Tlabunga Mizo driver-te chu Tablabagh-a border oupost bulah 99 Battalion BSF ṭhenkhatin an lo tibuai a; diriam taka an ṭawng khum bakah, silai an kau khum a, an hmai zawnah an tin a ni.

Tlabung MZP chuan, "Kan Mizopuite chunga thil thleng vang hian Mizo rilru a dam thei lo. "Ramri veng him tur sipaite'n an tih tur, an hna thawk loa an vemhim turte an rîkrâp zawk hi ná kan ti a, Mizote thlabár taka siamtu BSF zu rùite chet dan hi lungchhiatthlak kan ti tak zet a ni," an ti.

Ramria bungraw thiara veivak Mizo dri­ver-te lakah BSF-te'n harsatna an siam fo tawh nia sawiin Tlabung MZP chuan, ramria hna thawk ṭhin driver-te leh civil mi dangte himna turin a ṭul anga hma la turin thuneitute an ngen a ni.

99th Battalion BSF sipaite'n civil mi an rîkrâp nia sawi chungchang hi Tlabung SDPO K Beihmataosa chuan Inrinni khan a hmunah a enfiah a; 99th Battalion BSF Commandant-in tunlai hian Tlabung chhehvel a tlawh mek avangin he thil thleng chungchangah thil tih tur ṭulte a tifel nghal nia thu dawn a ni.