KHAWTHLIR
Leprosy Sunday
Baptist Kohhran chuan nimin khan phâr pual Pathianni, Leprosy Sunday an hmang. Leprosy Sunday pual hian chawhma inkhawmah kohhran tinah hun an hmang a, thupui chu, ‘Ka duh e, lo thianghlim tawh ang che’ tih a ni. Kum 2006-a BCM Assembly thurel angin January thlaa Pathianni hnuhnung berah Leprosy Sunday an hmang ṭhin a ni.
Thisen pe
Inrinni khan ITI Veng Bial KṬP-in Aizawl Civil Hospital tan thisen unit 51 an pe a, MSU headquarters, Tlungvel-in unit 22 an pe. Saron Veng Presbyterian Kohhranin an kohhran golden jubilee lawm nan Synod Hospital tan unit 42 an pe a, Lunglei Chanmari Bial TKP-in Lunglei Civil Hospital tan unit 13 an pe bawk.
Film Kûtpui
School Education department leh Children’s Film Society, India (CFSI) te chuan, vawiin aṭang hian Film Kutpui an buatsaih dawn a, February 3 thleng a awh ang. Film Kûtpui hi Aizawla sikul 12-ah neih a ni dawn a, vawiinah Edenthar Veng Primary School-ah hawn a ni ang. Zirlaite chu zirtir nei ṭha film an entir dawn a ni.
HIV+ te zirtir
Young Women Christian Association, World Vision, Kolasib District Network leh VIHAAN Help Desk ṭangkawp chuan, Kolasib district chhunga HIV+ te pualin an hriselna dinhmun enkawl dan tur zirhona Inrinni khan Kolasib District Network Office-ah an buatsaih a, HIV hrikin taksa a tihchhiat theih dan te, natna dang an kai theih dante leh in enkawl dan turte mithiamte'n an sawi a ni.
IKK inkhawmpui
Isua Krista Kohhran (IKK) hmeichhiate chuan, nimin Pathianni hmang khan Mizoram pumah pastor bial inkhawmpui an hmang a, nizan khan a ṭiak. IKK hmeichhe inkhawmpui hi January 27, 2017 zanah hmun hrang hrangah ṭan a ni a, Inrinni khan nilêngin rorel inkhawm an nei. IKK-ah hian Mizoram pumah pastor bial 14 a awm mek.