Mission Vengah puan dum an zár

Central YMA-in Mission Veng YMA North Branch hnena Mission Veng Branch YMA tih hming a puttir duh lohzia lantir nan, Mission Veng YMA South Branch chuan Inrinni khan an huam chhunga Mission Veng Bazar leh in hrang hrangah puan dum an zár.

Mission Veng YMA South Branch thuchhuah chuan, Central YMA thutlukna chu Mission Veng chhung boruak tichhe thei a ni tih sawiin, thutlukna sût leh tura an ngenna CYMA-in a tihlawhtling lo chu pawi an tih thu leh an lungawi loh tak zet thu an tarlang a, "Mission Vengah YMA branch pahnih kan awm avang hian veng mipuiah lungawi lohna leh inenhranna a awm ngai lo. Mission Veng kan ni vek tih hi kan rilru a ni. North Branch lamin Mission Veng hming pumbilh bik an tumna hi engtikah mah kan rem ti ngai lo ang," an ti.

Hetih lai hian, Mission Veng Kohhran chuan YMA-a North Branch leh South Branch-te chu kohhran khata láwi an nih avang leh an veng chhungah inremna a awm theih nan remna palai hna thawk tur mi paruk awmna Kohhran Remna Palai an din nia thu dawn a ni a; He thil thleng hi Central YMA president Lalbiakzuala pawhin pawi a tih thu a sawi a, an ngaihtuah zui vat tur thu Vanglaini a hrilh.