Secretary suspend-ah ZNP la lungawi lo

ZNP ṭhalaite chuan thuchhuah siamin, Nalanda Institute of Advance Studies (NIAS), Kolkata nena MoU ziah leh zirlai 32 tirh vanga Mizoram sorkarin inremna ziah laia Mizoram Building and Other Construction Workers Walfare Board (MBOCWWB) secretary Rotluanga suspend mah se, sorkarin a tih tur dik tak a la ti famkim loa an ngaih thu an tarlang.

ZNP ṭhalaite chuan, Mizoram Youth Commission (MYC) chairman T Sangkunga pawh mawhphurtu a ni ngeiah an ngai a, "NIAS leh sorkar inremnaah MYC chu mawhphurtu a ni tih a lang chiang reng a ni," an ti a; MYC Chairman chu bàntir ngei turin sorkar an phût a ni.

MNF ṭhalaite pawhin sorkar chu LEIT minister Lalrinmawia Ralte leh MYC chairman T Sangkunga te thil tihsual thup nana MBOCWWB secretary hlui Rotluanga suspend-ah an puh a, "Lalrinmawia Ralte leh T Sangkunga te hmai bâl phih fai nana Zoram mipuite rilru hruai pên an tumna maiah kan ngai," an ti.