ZPM-in AMC inthlan hunah symbol atan 'Tlang kara ni chhuak' an hmang dawn

ZPM Party AMC Monitoring Committee chuan nimin khan an pisa conference hall-ah AMC candidate turte tana hriat tur pawimawh inhrilhna hun an hmang a; AMC inthlan lo awm turah chhinchhiahna (symbol) atan 'tláng kara ni chhuak (sun with rays)' an hman dawn thu tarlan a ni.

Committee chairman K Sapdanga, ZPM vice president chuan, AMC inthlan awm tur atan ZPM chuan manifesto an siam tawh tih sawiin, "MLA inthlana kan symbol ‘Lukhum’ kha hman nawn leh kan duh a, Mizoram sorkarin min remtihsak tlat loh avangin AMC inthlan lo awm turah hian ZPM chuan symbol atan 'tlang kara ni chhuak' (sun with rays) hmang turin Committee chuan thutlukna a siam a ni," a ti . 

ZPM chuan AMC thar din an tum tih sawiin K Sapdanga chuan, "Pathian leh mipui zara kan sorkar chuan ward committee thuneihna pek te, chhiah petu mipui hnena pek kîr te, ṭhalaite tan eizawnna remchang a tam thei ang siam te, kut hna thawktute hamṭhatna ngêlnghet siamte leh, khawpui rálmuang leh mawi dinte hi kan tum a ni," a ti a; AMC kalphung atana sorkar dan siamte dik taka an tihpuitlin tur thu a sawi.

ZPM Vice President chuan, Municipal Ward Committee din an tum thu sawiin, "Thu­neihna leh mawhphurhna pawh ward committee kutah a awm ang. Mipuite'n AMC-a chhiah an pek - property tax leh parking fee-te hi khawpui tihhmasawnna atan ward committee kutah a awm ang a, chhiah petute hnenah an lungawina tling hmasawnna (development)-in pêk kîr a ni ang," a ti.

Inkhawm hi ZPM vice president Dr Kenneth Chawng­liana'n a kaihruai a, general secretary Lalmuanpuia Punte pawhin candidate-te hriat tur pawimawh hrang hrang a sawi a ni.