Building Regulation zâwm duh lote kan nawr chhiatsak ang - AMC Commissioner

Aizawl Municipal Corporation (AMC) commissioner Dr H Lalthangliana chuan, AMC Building Regulation zâwm lote chu dawhthei taka an nghah ṭhin thu sawiin, "Thu an zawm duh lo tlat a nih chuan kan nawr chhiatsak ang," a ti.

Dr H Lalthangliana hian nimin khan a pisaah thuthar thehdarhtute kum thar thingpui a inpui a, AMC hmachhawp leh hmalakna hrang hrangte a sawi a, "AMC Building Regulation zâwm lote in nawr chhiatsak rup rup hi kan tum a ni lo. Dawhthei takin dan an zawm hun kan nghak a, dan zawm loh a dik lohzia kan hrilh ṭhin," a ti a; Mizo mipuite'n dan an zâwm ṭha hlea a hriat thu a sawi.

Tun dinhmunah dan zâwm loa in sa zingah ṭhiah duh lo an la awm lo tih sawiin AMC Commissioner chuan, "Dan zâwm loa in sa, ṭhiat tura kan tihte chuan anmahni zelin an la ṭhiat a, a lawmawm khawp mai. Thu zâwm duh tlat lo an awm a nih erawh chuan keimahni'n kan nawr chhiatsak ang," a ti.

AMC Commissioner sawi danin, AMC chuan nikum chhung khan Building Regulation zâwm lo an awm leh awm loh endik rûnpui an nei a, mi eng emaw zat chu in sak chhunzawm lo turin an hriattir. Stay order an pekte chuan hna an thawh chhunzawm leh chhunzawm loh endik a ni leh dawn a, ti lui an awm chuan hremna na zawk pek tur an ni.

Dan zâwm lo tênau deuhte chu AMC pisaah koh an ni a, dan chhunga in an sak chhunzawm dan ngaihtuahsak niin, chawi ngai chawitir an nih hnuah sak chhunzawm phalsak an ni.

Mi ṭhenkhat chu anmahni'n dan an zawm loh vang ni lo, an architect rawihte'n an hrilh dik tâwk loh vanga chawitir leh in ṭhiah ngaite an awm ṭhin thu sawiin AMC Commissioner chuan, "Architect-te hian in sak chhung zawngin an vil tur a ni a, an pawisa hlawh tur zat pawh bituk vek a ni," a ti a; mipuite chu fimkhur turin a ngen.

Dr H Lalthangliana chuan Property Tax chungchang sawiin, "Veng pahnih tih loh chuan an thehlut vek tawh. Local council-te kaltlangin kan khawn a, kan ti fuh hle. A huna pete chu 10%-in kan tlàwm a, a huna pe lote chu a zat dik tak kan pektir thung," a ti a; property tax aṭangin sorkar kum kal mekah cheng nuai 189.06 an hmuh tawh thu a sawi.

Hmanhmawh taka thil an tih avangin property tax khawn hmaihte an neih thu sawiin AMC Commissioner chuan, "Mi eng emaw zat chu an in kan tehsak loh vang leh Property Tax kan khawn loh vangin office-ah an rawn kal a, property tax pek ve an duh thu an rawn sawi. Hetiang ram kan ni hi a lawmawm tak zet," a ti.

AMC Commissioner chuan, AMC-a thawk nia insawia building permit pek intiama pawisa phût an awm chuan AMC hotute hnenah thlen turin mipuite a ngen a; hetiang ti man chhuah an awm chuan an chungah action lak a nih ngei tur thu a sawi.

Vanglaini palai zawhna chhangin Dr H Lalthangliana chuan, AMC leh state sorkarin subject a inkhawih pawlh a awm nual avangin AMC subject khawih zat chiah hriat a harsat thu a sawi a, "Subject hi rawn transfer vek ta se staff lamah harsatna kan tawk ang. Tunah pawh kan indaih lo hle. Ministry of Finance chuan staff 1,000 vel mamawh anga min chhût laiin, 150 vel chauh tunah chuan kan awm," a ti.