World Leprosy Day Aizawlah hman a ni

Nimin khan Synod Conference Centre-ah World Leprosy Day hman a ni a, Health minister Lal Thanzara'n a hmanpui. Inkhawmah hian Mizoramah phâr vei enkawl lai mi 25 an awm thu tarlan a ni.

Health Minister chuan, phár natna chu hluar viau tawh lo angin lang ṭhin mah se, natna vei hmuh chhuah tur a awm zel ṭhin tih a sawi a, "Kum 2015 chhung mai pawha khawvel pum­puiah phár vei thar mi 2,10,000 an awm hian, he natna hi buaipui tham a nihzia a tichiang hle. India ram hi khawvelah phár natna hluarna rama an sawite zinga langsar ber a ni," a ti.

Phár natna veite enkawlna kawnga harsat­na lian tak tawh ṭhin chu enhran leh thinhrikna a ni tih sawiin Lal Thanzara chuan, "Inthliarna avang hian natna veite pawhin mithiamte pante an hreh phah a, chu chuan awmze neia enkawlna a tikhaihlak ṭhin," a ti a; phár natna veite en danah insiamṭhat a pawimawh thu a sawi.

Inkhawm hi Health principal director Dr K Ropari'n a kaihruai a; state leprosy officer Dr Chawngthanchhunga chuan, National Leprosy Eradication Programme hnuaia hmalakna hrang hrangte a tarlang.

National Leprosy Con­trol Programme hi kum 1955-ah India sor­karin a kalpui ṭan a, kum 1983 khan Mizoramah chuan kalpui ṭan a ni. January 2017 thleng khan Mizoramah phár natna vei mi 1,515 an awm a, an zinga 1,490 chu enkawl dam tawh niin, enkawl mek mi 25 an awm.