MBOCWWB fund chungchang ZNP President-in CBI chhuitir phût

ZNP president Lalduhoma chuan, Mizoram Building and Other Construction Workers Welfare Board (MBOCWWB)-ah thil dik lo inphûm rû lian tak a awma a lan thu sawiin, MBOCWWB fund ṭobul chu Central Bureau of Investigation (CBI)-in fiah taka an chhui an phût thu a puang.

Lalduhoma hian nimina an party pisaa inkhawmah thu sawiin, Mizorama contractor zawng zawngin MBOCWWB fund atan cess 1% an chhûng lut ṭhin tih a sawi a, "Contractor-in an chhûn luh hi thla tin engzat nge tih hriat kan duh. Sorkar suma lut lo, thámral ta a awm niin kan ringhlel a, an mualpho dawna a lan avang chauha nawr chêt chawp, wheel barrow sorkar kan hrawn mek. Sorkar hi he thil chhui zel tlakah kan ngai lo a, thu dik hailang tak tak turin CBI chhuitir kan phût a ni,” a ti.

Labour, Employment & Industrial Training (LEIT) director hlui Rotluanga suspend a nih chungchangah Duhoma chuan, “LEIT Director-in NIAS-a pawisa a pek tawh zawng zawng hi Board-in an remti vek a, Board chairman chu minister Lalrinmawia Ralte a ni. Chuvangin, Minister hian ka fihlim a ti thei lo reng reng," a ti a; Minister chu NIAS Kolkata-ah vawi hnih a kal thu LEIT Director-in a lo sawi tawh niin a sawi.

ZNP President chuan, MYC-in MBOCWWB sum nuai 15 dik lo taka pûk a nia sawiin, "Hei hi MYC chairman Pu T Sangkunga hian a hre lo em ni? Ngati nge vawiin thlenga rulh a la nih loh tih hi ka zawhna a ni?" a ti a; MBOCWWB sum chu kum 2013 in­thlanpui dawnah pawh nasa taka tihchingpen leh campaign-na atana hman niin thu a sawi.

Lalduhoma sawi danin, December 31, 2016 thlenga MBOCWWB-a inziak lut chu mi 23,766 an ni a, chungte chu labour/worker pawh ni lo, sum dawn duh vanga campaign-na hmanrua an ni. Inziak lut zinga a tam zawk chu dan angin an in renew tawh lo a, chuvangin chuan tuna registration nung zat chu mi 1,748 an ni.

Lalduhoma chuan, MBOCWWB leh MYC chu a ṭawp hle nia sawiin, "Home Minister-in a ṭul ang kan ti zel ang a ti a. A ṭul ang tih ngai lang reng hi ngati nge a tih nghal loh. Thu dik an hai lang tak tak dawn a nih chuan CBI chhuitir kan phût tlat a ni,” a ti.

ZNP thuchhuah chuan, nimina an party pisaa inkhawmah hian ZNP zawm thar mi ṭhenkhat an lawm lut niin a tarlang.