SIHM tipuitling turin sorkar phût

MNF senior vice president Tawnluia chuan, MNF sorkar lai, kum 2007 khan State Institute of Hotel Management (SIHM) dinna project an siam tawh leh kum 2012-a sak zawh tawh chu tipui­tling turin sorkar a phût.

Nimina Mizo Hnam Rûna inkhawmah thu sawiin Tawnluia chuan, SIHM dinna atan sorkar laipuiin cheng nuai 800 a rawn pe a, October 2007-ah Berawtlangah PWD-in a building an sa ṭan niin a sawi a, "Zirlai 100 awm thei tura ruahman a ni a, 20% chu Mizoram tan bik hauh a ni. Ṭhalaite'n phai lama zir ngai loin hmun leh hmuna zir theih turin kan siam a ni," a ti.

Tawnluia chuan, SIHM tur chu Congress sorkar hnu, kum 2012-ah sak zawh a ni tih sawiin, "Kan tum ang chuan kaltlangpui zel ila, phai lam pan buai a ngai lo ang," a ti a; Tourism department-in thawktu tur proposal a siam vek tawh pawh tun thlengin sorkarin thawktu tur a la thei lo niin a sawi.

MNF Sr. Vice President chuan, NIAS, Kolkata nena MoU ziah, zirlai tirh thlak leh zirlaite'n harsatna an tawh chung­changah MYC Chairman leh LEIT Minister-te chu an mawhphurhna la ngam loah puhin, báng tura a phût thu a sawi bawk.