Agriculture lama hmalakna thlirho

Nimin khan Directorate of Agriculture conference hall-ah, nikuma agricuture lama Mizoram sorkar hmalakna leh hlawhtlinnate thlirho a ni a, Agriculture minister R Lalzirliana'n a hmanpui.

Agriculture Minister chuan, sorkar hmalakna avangin lo neitute an phûr chho mek nia sawiin, agriculture lama mithiam­te chu nasa zawka thlawhhmate leh kut hnathawktute hmalakna hmunhmáte tlawh ṭhin tura a fuih a, "Lo neitute'n anmahni tlawhtu mithiam­te hnen aṭanga zir thar tur an neih ṭhin bakah, puih duhtu leh phûrpuitu an nei tih an hmuh hian phûrna an neih belh ṭhin a ni," a ti.

Inkhawma tarlan dan­in, Mizorama leilet, buh chìn theihna hmun atan finfiah tawh zau zawng chu hectare 74,644 a ni a, kum 2015-16 chhung khan hectare 17,302-ah leilet siam a ni. Tlang ram lo neihna hmun chu hectare 19,851-in a zîm tawh thung.

Kum 2015-2016 chhunga leilet leh tlang­ram lo aṭanga buh thar chhuah zawng zawng belhkhawm chu metric ton 62,089 a ni a, kum hmasa a thar chhuah aiin 2.24%-in a tam zawk a ni.