Vairengte mipuiin naupang thih dan Chhui chhuak turin sorkar an phût

Vairengte pawl hrang hrang (all NGO), VC hrang hrang, Vairengte Khasi Welfare leh Gorkha Association-te huaihawtin nimin khan Vairengte mipuite'n an khuaah kawng an zawh a; an khaw naupang Lalsiamthara s/o Zothanmawia bo chungchangah thu dik chhui chhuak vat turin sorkar an phût.

Kawngzawh hi chawhma dar 11-ah ṭan a ni a, Lalsiamthara thihna chungchanga rorelna dik tak a awm an phûtna thuziak chi hrang hrang an keng. Kawngzawh chhungin dàwr zawng zawng khàr a ni a, Assam lam aṭanga hnam dang lut ṭhinte pawh páwna chhuah an remti lo a ni.

Kawngzawh huaihawttute chuan resolution siamin, "November 11, 2020-a bo Lalsiamthara s/o Zothanmawia bo chungchangah hian kan police leh kan sorkar chak tak hian a rang thei ang berin thu dik chhui chhuak thuai rawh se," an ti. 

   Vairengte  resolution  dangte

-    Vairengte mipuite'n ni 7 chhung kan zawn hnua Lalsiamthara ruang kan hmuh chungchangah Mizoram Police leh Forensic Science & Laboratory-te hian a thih chhan dik tak a rang thei ang berin Vairengte leh Mizoram mipui hriatah puang rawh se.

-    Vairengte khaw mipui leh Mizo fate him nan kan sorkar chak tak hian Mizoram leh Assam ramri dep khua zawng zawngah nasa lehzualin venhimna kawngah hma la rawh se.

-    Lalsiamthara bo leh a ruang kan chhar chungchangah thu dik tak puan chhuah a nih loh chuan Vairengte mipui hian kan thiam dan ang angin thu dik chhui chhuak turin hma kan la ang.

-    Naupang khawngaihthlak Lalsiamthara chunga thil thleng ang hi tun hnuah Mizo fate chungah thleng tawh lo se. Zo fate leh ram humhim nan chuan Vairengte khawtlang hian a theihtawpin hma a la zel dawn a ni.

-    Lalsiamthara bo chungchanga thâ leh zung séngtu kan khaw ṭhenawm khuate chungah Vairengte mipuite'n lawmthu kan sawi. Mizoram mipui min ṭawngṭaisaktute leh sum faia min ṭanpuitu zawng zawng chungah lawmthu kan sawi bawk.