AH&Vety-in SEDP Pilot Project tlangzarh

AH&Veterinary department chuan nimin khan Veterinary Polyclinic Hospital conference hall-ah Socio Economic Development Programme (SEDP) Pilot Project an tlangzarh. SEDP-ah hian AH&Vety aṭangin ṭanpuina dawng tur (beneficiary) 1,020 an awm dawn.

AH&Vety minister Dr K Beichhua chuan, SEDP kaltlanga ran vulh ṭanpuina an pek tur chu a thlàwna sum sem anga ngai lo turin a dawngtute a ngen a, "Covid-19 hri léng avang leh African Swine Fever kan ṭhenawm state-ah a lèn avangin sa lam chi lak luh khap a ni. Mizoramin sa kan mamawh zat kan thar loh avangin kan intodelh theih nan SEDP-ah ran vulh ṭanpuina hi intodelhna atana hmalakna a ni," a ti.

Sorkar sum harsatna karah SEDP ṭanpuina an pe chhuak tia sawi an awm theih thu sawiin K Beichhua chuan, "He sum hi kum 2019-20 financial year-a mi a ni. Hri léng avangin tlânchhe thei kan ni lo a, saah hian intodelh ila, state dangahte thawn chhuak thei hial ila tih kan duh. Chuvangin, hei hi sa lama kan intodelh tura hmalakna a ni," a ti a; an hmalakna thláwp turin mipui a ngen.

AH & Vety director Dr Hmarkunga sawi danin, beneficiary thlang turin district pariatah DC-te chairman-na hnuaiah District SEDP Beneficiary Selection Board siam a ni a, DVO te member secretary an ni. Department-in infrastructure duh ang a la neih remchan loh avangin district thar 3 te hi a hluiah beh tir lailawk an ni.

AH&Vety department hnuaia financial year 2019-20 atana SEDP Pilot Project kalpuina atan Planning Board chuan cheng nuai 1895.28 a ruahman. Chuta ṭang chuan vawk, vawkpui, broiler leh rainbow rooster vulh ṭanpuina pek tura ruahman a ni a, ṭanpuina dawng tur zat chu chhungkaw 1,020 an ni.

Vawkpui leh vawk vulh turte hnen­ah Rs. 3,00,000, broiler ár leh rainbow rooster ar vulh turte hnenah Rs. 1,50,000 ṭheuh pek a ni dawn. Ṭanpuina hi thawh (instalment) hniha pek a ni dawn a, district tina DVO-te'n beneficiary-te training an neihpui vek hnuah DVO account aṭangin a dawng turte account-ah ṭanpuina sum thun a ni ang.