Covid-19 vei 23 hmuh belh a ni Vei 226 zinga 148-in an vei tawh lo

July 9, Ningania Zoram Medical College (ZMC) Covid-19 Laboratory-a swab sample endikah mi 23-in Covid-19 hripui an vei tih hmuh chhuah leh a ni a; Mizorama hripui vei hmuh chhuah tawh zawng zawng chu mi 226 an tling ta. Hripui vei mek mi 78 an awm a, mi 148 erawh chu an negative leh tawh thung.

SRH-ZMC Covid-19 Bulletin tarlan danin, July 9 khan ZMC laboratory-ah mi 333-te swab sample endik a ni a, hripui lakah mi 310 an fihlim laiin, mi 23-te'n an vei tih hmuh a ni. An vai hian nimin khan State Referral Hos­pi­tal-ah dah luh nghal an ni. Hripui vei hmuh thar mi 23-te hi mipa 22 leh hmei­chhia pakhat an ni a; hmeichhia hi Aizawl district-a kum 26 mi, tun hnaia Kolkata aṭanga rawn haw niin, mipa zawng chu sipai an ni. Sipai 22-te hi hnam dang vek niin, kum 27-51 inkar an ni a; mi 15 chu Assam Rifles sipai, Zokhawsanga awm mekte an nih laiin, mi pasarih chu NDRF mi leh sa, Lungverha awmte an ni thung.

Hetih lai hian, Mamit district-a Covid-19 vei la awm mi pali, hmeichhia vek chu July 8-a endik nawnnaah hripui an vei tawh lo (negative tawh) tih hmuh chhuah a ni a, vawiin hian Dedicated Covid Health Centre (DCHC) 

aṭangin an chhuah theih beisei a nih thu dawn a ni. Mamit district-ah hian Covid-19 vei hmuh chhuah tawh zat chu mi 20 an ni a, mi 16 chu dam takin an chhuak tawh a, mi palite an negative ve leh tâk avangin hripui vei an awm tawh lo. Saitual leh Khawzawl district-ah pawh Covid-19 vei an awm tawh rih lo a, Hnahthial district-ah vei hmuh chhuah an la awm lo bawk.

Ningania ZMC Covid-19 Laboratory-a sample endikte chu mipa 230 leh hmeichhia 103 an ni a; State Referral Hospital (SRH)-a awm sa mi pali bakah, Aizawl district mi 177, Lawngtlai district mi 43, Mamit district mi 51 leh Siaha district mi 58 an ni. Nimin khan swab sample eng emaw zat an endik leh bawk. ZMC Laboratory-ah hian nimin khan mi eng emaw zatte swab sample endik leh a ni a, result kan hre hman lo.