Khawpui fai intihsiakna endik mek

Urban Development & Poverty Alleviation (UDPA) department buatsaih, Mizorama khawpui (census town-te) fai intihsiaknaa endiktute chuan district hrang hrang tlawhin endik hna an thawk mek a; nimin khan Siaha leh Lawngtlai khawpui an endik.

Mizoram Sanitation Task Force (MSTF) hnuaia khawpui fai endiktute (panel of expert) chuan nimin zing khan Siaha khawpui fangin an endik a, chaw­hnu lamah Lawngtlai khaw­pui an endik leh nghal. Lawng­tlaiah hian khawpui chhung an fan kual hnuah NIC Confe­rence Hall-ah Lawngtlaia UDPA hotute nen an inkâwm a ni.

Endiktute hian an kalna khawpui apiangah khaw chhung hmun hrang hrang an fang ṭhin a; sorkar hotute leh khawtlang hruaitute kâwmin, hma an lâk dante an zawt ṭhin bawk.

Panel of expert-ah hian member pali - IPRO Dr Saithan­tluangi Zote, Mizoram Pollution Control Board-a programme officer R Lalrinfeli, Central YMA assistant secretary Prof. Malsawmliana leh MJA secretary Lal Rinmawia te an tel a; UDPA department aiawhte'n an ṭawiawm. Nimin tlai khan Lunglei an pan a, vawiinah an endik leh nghal ang.

Mizoram Khawpui Fai Inelna 2020 hi ṭhuang thuma kalpui a ni a; Category I-ah district khawpui (headquarters) 11, Category II-ah khawpui (census town) dang 12 leh, Category III-ah khawpui zawng zawng (23) an awm a ni.