Faina lama inelna lawmman sem a ni ; Ward XVIII, Saitual leh Biate an fai ber

UDPA bultuma Mizoram pum huapa faina kawnga inelna, Mizoram Cleanliness Competition 2021-a ti ṭhate hnenah nimin khan Vanapa Hall-ah lawmman sem a ni. Aizawl Municipal Corporation-a Ward XVIII, Saitual, Biate, Laipuitlang Local Council leh Kolasib Ṭumpui VC-te'n lawmman pakhatna an dawng.

Fai lawmman semtu deputy chief minister Tawnluia, UDPA minister chuan, kum 2014-a India hnam pa Mahatma Gandhi pian champha vawi 125-na puala sorkar laipuiin faina beihpui thlakna, Swacch Bharat Mission an siàm chu Mizoramah pawh tun thlengin theihtawp chhuahin kalpui a la nih thu a sawi.

Tawnluia chuan, "Faina leh thianghlimna kawnga sorkar hmalakna leh he thila khawtlang hruaitute leh tlawmngai pawl hrang hrangte thawhhona leh ṭanhona zarah Aizawl leh Mizoram khawpui dangte'n faina lamah hma an sawn chak hle niin ka hmu," a ti.

Deputy Chief Minister chuan, bawlhhlawh hman ṭangkai leh sâwngbàwl lama sorkar hmalakna sawiin, "Department chuan self help group hmang ṭangkaiin bawlhhlawh aṭanga thil ṭangkai siam chhuah, Waste to Earth ruahmanna a kalpui mek. Bawlhhlawh aṭanga thil ṭangkai siam chhuah leh bawlhhlawh ṭawih ral thei hmanga leiṭha siam, home composting-te chu SEDP hnuaia trade thlan theih turin ruahman a ni," a ti a; faina lama sorkar hmalakna ṭawiawm turin mipui a sáwm.

Lawmman hlanna inkhawm hi UDPA secretary K Lalthawmmawia'n kaihruaiin, khualzahawm MLA C Lalmuanpuia pawhin thu a sawi a, UDPA director H Lianzela'n Mizoram Khawpui Fai Intihsiakna buatsaih a nih chhante leh kum hmasa lama kalpui dante a sawifiah.

Chawhnu lamah Faina Inkhawmpui (Swachhta Conclave) neih zui a ni a, faina leh thianghlimna, bawlhhlawh sâwngbàwl, Open Defecation Free Plus, Swachh Survekshan leh hman khat daih sarâng ṭhat lohna chungchangte inzirtir a ni a, hmalak zel dan tur an sawiho nghal.

Fai lawmman hi khawpui fai te, faina lama local council leh village council thawk ṭha te, faina leh thianghlimna lama kum 2021 chhunga hmasawn chak district khawpui leh khawpui dangte hnenah hlan a ni a; khawpui hrang hrang aṭanga thlan Faina Pasalṭha (Swachhta Warriors) pakua hnenah chawimawina hlan a ni bawk.

Tun ṭuma Khawpui Fai inelna hi October 2, 2021-ah ṭanin November 30, 2021 thleng Mizorama khawpuite an inpuahchah a; endiktute'n December 1, 2021-ah an endik ṭan. Endiknaah hian faina leh thianghlimna bakah, bawlhhlawh sâwngbâwl dan, inthiarna fai ṭha leh changtlung, garbage free ni tura an hmalaknaah te leh ram leilung humhalhna kawnga an hmalaknate a tel a ni.