MADC-ah sorkar siam thei la awm lo ; Governor's Rule-ah dah a ngai dawn
Mara Autonomous District Council (MADC)-ah nimin tlai thleng khan sorkar siam thei an la awm lo a, nizan zanlai dar 12 thlenga sorkar siam thei an awm loh chuan Governor's Rule-ah dah a ngai dawn.
Siaha aṭanga Vanglaini thu dawn danin, political party hrang hrangte chu sorkarna siam tumin an la indawr reng a, mahse, he thu ziah lai thleng chuan sorkar siam thei an la awm lo. Sorkarna siam tura hun bituk chu nizan dar 12 khan a tàwp a, sorkarna siam thei an awm leh awm loh Vanglaini chuan a hre hman lo.
Siaha district bawrhsap Lalsangliana hnen aṭanga thu dawn danin, MADC-ah hian hun tiam chhunga sorkar siam thei an awm loh chuan DC lam kut a ni tawh lo a, Governor-in thutlukna a siam tur a ni.
Nizan zanlai dar 12 thlenga sorkarna siam thei an awm lo a nih chuan MADC chu Governor's Rule-ah dah a ni ang a, thla ruk chhungin inthlanna buatsaih leh a ni ang.
Hetih lai hian, nimin khan Governor-in protem chairman atana a ruat K Hrahmo kaihhruaiin 12th MADC session hmasa ber neih a ni a, legislature group leader-te'n thu an sawi hnuah session tihtawp a ni. BJP aṭangin M Laikaw, MNF aṭangin N Viakhu leh Congress aṭangin H Malvin ten thu an sawi.
Protem Chairman chuan, Governor-in chief executive member leh chairman thlan hun tur hriattirna a chhuah dawn thu a sawi a; Governor thuchhuak nghah a ngaih avangin chawhma dar 10:55 khan session a titawp nghal a ni.
May 5, 2022-a MADC inthlanpui neiha vote tlate chu May 9 khan chhiar a ni a, BJP-in seat 12, MNF-in seat pakua leh Congress-in seat pali lain, sorkar siam tura seat lak ngai zat 13 la phak an awm lo. Hei vang hian political party hrang hrangte chu sorkarna siam turin nimin thleng khan an la indàwr a ni.
Tarlan tawh ṭhin angin, BJP chuan sorkarna siam theih ngei an inbeisei thu Vanglaini an lo hrilh tawh a, Congress party chuan MNF leh BJP thawhpui an tum loh thu an sawi a; MNF adviser Dr K Beichhua pawhin a ṭul chuan opposition ni tura an inpeih thu a lo sawi tawh bawk.