MNF adviser Dr R Lalthangliana, minister chuan, Covid-19 leng karah pawh MNF sorkarin nasa takin hna a thawk nia sawiin, hripui leng lo se tuna an thawh let an thawh a rin thu a sawi.
Dr R Lalthangliana hian nimin khan Cher­hlun community hall-ah MNF political training-ah thu sawiin, "Covid dona turin budget-ah pawisa dah lâwk a awm lo a, department hrang hrang sum kan pawt khawm a, kalphung pangngaiin sorkar kan kal thei lo. Chuti chungin hmasawnna eng emaw zat kan paw chhuak tawh a, Covid awm lo phei se chuan tun term-ah hian tuna kan thawh lêt eng emaw zat kan thawk tawh ang," a ti. 
Nakkum lamah chuan Covid-19 a reh tawh ang a, nasa takin ram tan an thawk zel dawn tih sawiin R Lalthangliana chuan, "Nakkum inthlanah Pathian leh mipui zarah kan sorkar leh ngeiin ka ring. MNF hi Pathian leh kan ram tan titu kan ni a, kan dah hmasak ber chu Pathian a ni," a ti a; Congress leh ZPM dinhmun chhiatzia hretu­te an nih thu a sawi.
Dr R Lalthangliana hian Cherhluna kilowatt 50 siam chhuak thei Solar Power Plant a hawng a; Plant hi August 11, 2019-a thawh ṭan niin, 'My project, My NEDP' aṭanga cheng nuai 100 chuang hmangin MiMIR (Mipui Mamawh Inṭâwm Ruahmanna) Committee, Cherhlunin an thawk a ni.