ZPM leader Lalduh­oma chuan Mizoram chu ram ṭha lehzuala siam an tum thu leh, rorel lai MNF-te'n kum 2023 inthlanpuiah candidate ṭha tak tak an nei leh a nih pawhin, an hruaitute avangin mipuiin an hnâwl tawh a rinawm thu a sawi.
Lalduhoma hian nimin khan Chalráng leh New Chalráng khuaa vantlang inkhawmah thu sawiin, "ZPM hian tihhlawhtlin duh kan nei a, chu chu kalphung thar, mipui sorkar siama Zoram hi ram ṭha lehzual zawka siam kan tum a ni," a ti. 
Mizoram chu Cong­ress leh MNF party kaihhruai sorkarna hnuaiah a awm char char tih sawiin, "Kan ko hi thlâk a hun tawh a ni tih hi mipui mimir ngaihtuahnaah a lian tawh hle a ni," a ti a; MNF chu rorel lai ni mahse an hruaitute dik loh avangin an tluchhe mek a, an rorelna hnuaiah ram a dam lo a, mipui pawh an dam lo tih a sawi.
ZPM Leader chuan, MNF-te chu an hruaitute chêt dan avangin an rilru a ná tih an hriat thu sawiin, "Hetiang hi ni mah se, rorel lai party an nih avangin kum 2023 inthlanah pawh candidate ṭha tak tak an rawn nei leh ngeiin a rinawm. Candidate ṭha tak tak rawn nei leh mah se, an hruaitute avang hian mipuiin an hnâwl a rinawm tawh a ni," a ti.
Lalduhoma chuan, MNF sorkarah Mizoramin sum leh paiah harsatna nasa tak a tâwk tih sawiin, health care-ah mi 23,197-te bill cheng vbc 59.55 a tàng mek thu te, tar pension a tàn mek thu te, loan an lâk khawm hmangin restricted tender-in an duhsak zawngte contract an inpek nasat thu te, mipui sum hmanga hnathawhte chu a chhiat em em thute a sawi. India ramah leh Mizoramah Congress party dinhmun a tlakhniam nasat thu a sawi bawk.