CM-in lìrnghîng chungchang Union Minister hnenah a thlen

Chief minister Zoramthanga chuan nimin khan sorkar laipuia Mines minister Pralhad Joshi hnenah lehkha a thawn a, tun hnaia Mizoram khawchhak tlangdung chu lìrnghîngin vawi tam tak a sâwi tawh thu thlenin, uluk leh chiang zawka zir tur mithiam Mizorama tír turin a chah.

Chief Minister chuan, kumin June 21 aṭanga July 9 thleng khan Mizoramah magnitude 4.2 aṭanga magnitude 5.5 inkar lîrnghîngin vawi 50 chuang Champhai district chu a nghawr tawh thu Union Minister a hrilh a, "Lirnghing avang hian in eng emaw zat a chhe tawh. Mipui a tithlabár a, ina riak ngam loin páwnah an riak hial tawh a ni," a ti.

Zoramthanga chuan, Mizoram dinhmun zir chiang turin Geological Survey of India aṭangin expert seismologist/geo-physicist tír turin Pralhad Joshi chu a ngen a; India hmarchhak state-te chu lirnghingin a nghawr nat theihna ber zone (Zone-V)-a awm an nih avangin Mizoram khawchhak lamah Earthquake Obser­vation Centre dah belh a nih theih nan hma laksak tur leh, district tinte chu microseismic zonation tih a nih theih nan hma lakpui turin a ngen bawk.